Kattaqo‘rg‘on tumanida pistachilikni rivojlantirish uchun 20 milliard so‘m ajratiladi
2026-01-07 09:30:00 / E’LON
O‘zbekiston Respublikasi Prezidentining 2025 yil 27 dekabr kuni qabul qilingan PQ–392-son qaroriga muvofiq, Kattaqo‘rg‘on tumanida yirik pistachilik loyihasi amalga oshirilishi belgilandi.
Xususan, Kattaqo‘rg‘on tumani Moybuloq massivida 2030 yilgacha 5 ming gektar maydonda pistazor barpo etish rejalashtirilgan. Loyihani amalga oshirish uchun Respublika byudjeti hisobidan 20 milliard so‘m mablag‘ ajratiladi.
Loyiha doirasida davlat mablag‘lari hisobidan quyidagi ishlar amalga oshiriladi:
— 24 km elektr tarmoqlari tortiladi;
— 50 ta artezian quduq qaziladi;
— 10 km pistazor atrofi o‘rab chiqiladi.
Pistazor tashkil etish istagida bo‘lgan tadbirkorlar ko‘chatlar oladi, shuningdek, tomchilatib sug‘orish tizimini joriy qiladi. Qolgan xarajatlar yuqorida aytilganidek, Davlat hisobidan amalga oshiriladi.
Ma’lumotlarga ko‘ra, dunyoda pistachilik rivojlangan va asosiy eksportyor davlatlardan biri Turkiya hamda Eron hisoblanadi.
Shu munosabat bilan, o‘ta qo‘rg‘oqchilik sharoitida yetishtiriladigan pistachilik tajribasini o‘rganish maqsadida (joriy yilning 15–20 yanvar) kunlari Eron Islom Respublikasiga xizmat safari rejalashtirilmoqda.
Kattaqo‘rg‘on tumanida pistachilik loyihalarini amalga oshirish hamda Eron davlatida tajriba almashish istagida bo‘lgan tadbirkorlar delegatsiya tarkibida xizmat safarida ishtirok etishga taklif etiladi.
Murojaat uchun:
📞+998-93-955-44-77
Kattaqo‘rg‘on tuman hokimligi bosh mutaxassisi — Esanov Sherzod