Paxtakor tumanida nogironligi bo‘lgan bolalar uchun “Kunduzgi parvarish” xizmati yo‘lga qo‘yildi
2025-08-25 15:00:00 / Yangiliklar
O‘zbekiston Respublikasi Prezidentining 2025-yil 3-fevraldagi “Nogironligi bo‘lgan bolalarga ijtimoiy xizmat va yordam ko‘rsatish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi 41-sonli qarori ijrosi doirasida yana bir muhim amaliy tashabbus ro‘yobga chiqarildi.
Mazkur qaror orqali “Kambag‘allikdan farovonlik sari” dasturining samarali ijrosini ta’minlash, oilalarning mehnat qilish imkoniyatini cheklovchi omillarni bartaraf etish, nogironligi bo‘lgan bolalarni oila bag‘rida saqlash hamda ijtimoiy yetimlikning oldini olish kabi muhim maqsadlar belgilangan.
Shu asosda, Paxtakor tumanida Ijtimoiy himoya milliy agentligining Jizzax viloyati boshqarmasi va yakka tartibdagi tadbirkor Yangibayev Xasan Abdullayevich hamkorligida davlat-xususiy sherikchilik asosida “Kunduzgi parvarish” xizmati tashkil etildi.
Tashkilotning ochilish marosimida Paxtakor tumani hokimi vazifasini bajaruvchi Abduvoxidov Husan Bo‘ltakovich hamda tegishli soha mutasaddilari ishtirok etdi.
Tegishli komissiya xulosasiga ko‘ra, ushbu markazga dastlab 11 nafar 3 yoshdan 17 yoshgacha bo‘lgan nogironligi bo‘lgan bolalar yo‘naltirildi. Ular uchun haftaning 5 kuni, har kuni 9 soatdan ijtimoiy xizmatlar va yordamlar ko‘rsatilmoqda.
Hozirda mazkur xizmat doirasida qamrovni kengaytirish hamda bolalar sonini 20 nafarga yetkazish bo‘yicha zarur chora-tadbirlar amalga oshirilmoqda.