Paxtakor tumanida takroriy ekinlar ekish va qo‘shimcha faoliyat turlarini rivojlantirish bo‘yicha amaliy seminar o‘tkazildi
2025-08-15 11:00:00 / Yangiliklar
Paxtakor tumanida g‘alladan bo‘shagan yer maydonlaridan samarali foydalanish, takroriy ekinlar ekish hamda paxta-g‘alladan tashqari boshqa qo‘shimcha faoliyat turlarini yo‘lga qo‘yish orqali daromad olish imkoniyatlariga bag‘ishlangan amaliy seminar tashkil etildi.
Seminar Paxtakor tumani fermerlar kengashi mutaxassisi Abjambilov Bunyod va markaz agronomi Ochilov Tolib tomonidan tashkil etilib, unda 2025-yilda bo‘shagan yer maydonlaridan unumli foydalanish, eksportbop mahsulotlar yetishtirish hamda diversifikatsiyalashgan faoliyatlar orqali fermer xo‘jaliklarining daromadlarini oshirish masalalari muhokama qilindi.
Tadbir doirasida “Turon xirmoni” fermer xo‘jaligi misolida ko‘rgazmali seminar o‘tkazilib, unda 45 gektar g‘alladan bo‘shagan yer maydonida takroriy ekinlar yetishtirish va asalarichilikni yo‘lga qo‘yish orqali daromad olish tajribasi namoyish etildi.
Hozirda “Turon xirmoni” fermer xo‘jaligi paxta va g‘alla yetishtirish bilan bir qatorda asalarichilik faoliyatini ham rivojlantirmoqda. Fermer xo‘jaligi dastlab 10 dona asalari uyasi bilan ish boshlagan bo‘lib, hozirga kelib ularning soni 30 donaga yetkazilgan va bu orqali qo‘shimcha daromad olinmoqda.