Jizzax viloyati bojxona boshqarmasi boshlig‘i Farhod Ortiqov boshchiligidagi ishchi guruh “Paxtakor Teks” MCHJda sayyor uchrashuv o‘tkazdi.
2025-08-14 16:00:00 / Yangiliklar
Jizzax viloyatida mahalliy ishlab chiqaruvchilarni qo‘llab-quvvatlash, tashqi bozordagi raqobatbardoshligini oshirish va bojxonadagi muammolarni samarali hal etish maqsadida amaliy chora-tadbirlar izchillik bilan amalga oshirilmoqda.
Ana shunday tashabbuslar doirasida “Paxtakor Teks” MCHJda Jizzax viloyati bojxona boshqarmasi boshlig‘i Farhod Ortiqov boshchiligidagi ishchi guruh sayyor uchrashuv o‘tkazdi.
Trikotaj va to‘qimachilik mahsulotlari ishlab chiqaradigan bu korxona 360 nafardan ortiq aholini doimiy ish o‘rni bilan ta’minlab kelmoqda. 2025 yilning dastlabki oylarida 945 ming dollarlik mahsulot eksport qilinib, asosiy yo‘nalishlar sifatida Turkiya, Xitoy va Rossiya tanlangan.
Shu bilan birga, korxona 15 million dollarlik xomashyo va uskunalar import qilib, 21 milliard so‘mlik bojxona imtiyozlaridan foydalangan. Bu esa 2022 yil 25 aprelda Prezidentimiz tomonidan qabul qilingan “Bojxona hududida qayta ishlash bojxona rejimi qo‘llanilishini soddalashtirishga oid qo‘shimcha chora-tadbirlar to‘g‘risida”gi farmonning samarasi ekanini yaqqol ko‘rsatadi.
Farmonga muvofiq, xomashyoni mahalliy hududda qayta ishlash, so‘ng jahon bozoriga tayyor mahsulot sifatida chiqarish uchun qator yengillik va imtiyozlar joriy etilgan. Bu tadbirkorlar uchun yangi iqtisodiy naf keltiradigan muhit yaratdi.
— Bugun “qayta ishlash” bojxona rejimi orqali mahalliy sanoatga ishonch bag‘ishlanmoqda, — deydi Farhod Ortiqov. — Bu rejimning soddalashtirilishi va imtiyozlar tizimi faol tadbirkorlarimizning tashqi bozorga yo‘nalishini osonlashtirmoqda. Bugungi uchrashuv orqali tadbirkorlar amaliy maslahat oldi, rejalarini qayta ko‘rib chiqish imkoniyatiga ega bo‘lishdi.
Uchrashuvda "qayta ishlash" rejimi bo‘yicha huquqiy tushunchalar, imtiyozlardan to‘g‘ri foydalanish, hujjatlashtirish va muddat masalalari yuzasidan aniq yo‘l-yo‘riqlar berildi. Bu kabi ochiq muloqotlar tadbirkorlarning ishonchini oshirishda, muammolarni joyida hal etishda muhim vosita bo‘lmoqda.
Jizzax tajribasi shuni ko‘rsatmoqdaki, ishlab chiqarishni qo‘llab-quvvatlash bilan birga, uni tashqi bozorga olib chiqish uchun zarur huquqiy va iqtisodiy sharoitlarni yaratish — barqaror iqtisodiy o‘sishning negizi hisoblanadi.