Paxtakor tumanida takroriy ekinlar hosilga kirmoqda
2025-08-14 09:00:00 / Yangiliklar
Paxtakor tumanidagi ilg‘or fermer xo‘jaliklari tomonidan g‘alladan bo‘shagan yer maydonlariga ekilgan takroriy ekinlar hozirda hosilga kira boshladi.
Shu munosabat bilan Paxtakor tumani Fermerlar kengashi mutaxassisi Abjambilov Bunyod va tuman bosh agranomi Ochilov Tolib ishtirokida tumandagi faol fermer xo‘jaliklari uchun seminar tashkil etildi. Unda takroriy ekinlarni ekish, ularni parvarish qilish, biologik himoya vositalaridan foydalanish, hosilni ichki va tashqi bozorlarga chiqarish imkoniyatlari haqida keng qamrovli ma’lumotlar berildi.
Jumladan, “Damin ota” fermer xo‘jaligi tomonidan g‘alladan bo‘shagan 50 gektar yer maydonida mosh, poliz va ozuqa ekinlari ekilgan. Ayni paytda mazkur xo‘jalikda poliz ekinlari hosilga kirib, pishish bosqichiga yetgan. Seminar davomida ushbu ekinlarga zarar yetkazuvchi hasharotlar va kasalliklarga qarshi kurashishda kimyoviy emas, balki ekologik toza biologik preparatlardan foydalanish afzalliklari tushuntirildi.
Shuningdek, takroriy ekinlar orqali yil davomida 2-3 marta hosil olish, eksportbop mahsulotlar yetishtirish orqali qo‘shimcha daromad topish va yerdan samarali foydalanish yo‘llari fermerlarga amaliy misollar asosida ko‘rsatib berildi.