Ijtimoiy moslashtirish oyligi doirasida ma'naviy-ma'rifiy tadbir tashkil etildi
2026-06-26 15:30:00 / Yangiliklar
"Ijtimoiy moslashtirish oyligi" doirasida Paxtakor tumani IIB Jamoat xavfsizligi xizmati Probatsiya guruhi hisobida turgan yoshlar ishtirokida ma'naviy-ma'rifiy tadbir tashkil etildi.
Tadbir doirasida ular tuman Axborot-kutubxona markaziga tashrif buyurib, kitobxonlikni targ‘ib etishga qaratilgan uchrashuv hamda psixologik treninglarda ishtirok etdilar. Mashg‘ulotlar davomida yoshlarning huquqiy ongi va dunyoqarashini yuksaltirish, ularni jamiyatga moslashtirish hamda sog‘lom turmush tarzini shakllantirish masalalariga alohida e'tibor qaratildi.
Shuningdek, Paxtakor tumani IIB JXX Probatsiya guruhi nazoratida jazo muddatini o‘tayotgan 5 nafar mahkumning ijobiy xulq-atvori, tuzalish yo‘liga qat'iy kirganligi va qonun talablariga rioya qilganligi inobatga olinib, JIB Zafarobod tumani sudi tomonidan O‘zbekiston Respublikasi Jinoyat kodeksining 73-moddasiga asosan muddatidan ilgari shartli ravishda jazodan ozod etildi.
Mazkur tadbirlar probatsiya nazoratidagi shaxslarni ijtimoiy hayotga muvaffaqiyatli qayta moslashtirish, ularning qonunga itoatkor hayot kechirishiga ko‘maklashish hamda takroriy huquqbuzarliklarning oldini olishga xizmat qilmoqda.