Jizzax viloyati Paxtakor tumani hokimligi

Xayrulla Xo‘jamovich G‘aziyev Paxtakor tumani prokurori 2026-yil iyun ma’ruzasi

Hurmatli Paxtakor aholisi!

Tuman prokuraturasi tomonidan O‘zbekiston Respublikasi Prezidentining 05.01.2026-yildagi PQ-1-sonli va PQ-2-sonli qarorlari ijrosi yuzasidan qat’iy nazorat o‘rnatilgan.

Shuningdek, ishlarni kompleks tashkil etish maqsadida tuman yo‘l xaritasi ishlab chiqildi va unga muvofiq tumandagi 15 ta mahallada xavfsiz muhitni yaratish hamda huquqbuzarliklarning barvaqt oldini olishga qaratilgan “Yo‘l xaritalari” tasdiqlanib, ijroga qaratildi.

Bundan tashqari, tuman ishchi guruhi tomonidan hududlarga biriktirilgan mas’ullar hamda “mahalla yettiligi” ishini to‘g‘ri tashkil etilishida ko‘maklashish, ularni uslubiy qo‘llanmalar bilan ta’minlash hamda faoliyatini muntazam o‘rganib borish choralari ko‘rilmoqda.

Shu kabi, Akademiya xodimlari tomonidan huquqbuzarlik va jinoyatlarni o‘z vaqtida aniqlash hamda ularning oldini olish masalalari ilmiy yondashuvlar asosida o‘rganilib, mahallalardagi kriminogen vaziyatga ta’sir ko‘rsatuvchi sabab va omillar, jinoyat sodir etilishiga zamin yaratayotgan shart-sharoitlar hamda ijtimoiy-maishiy muammolar, olib borilayotgan profilaktik ishlar tahlil qilinmoqda.

O‘rganishlarning dastlabki yakunlari bo‘yicha har bir mahallaning o‘ziga xos xususiyatlari inobatga olinib, Akademiya tomonidan respublikaning barcha tumanlaridagi “mahalla yettiligi” (mahalla raisi, hokim yordamchisi, yoshlar yetakchisi, xotin-qizlar faoli, profilaktika inspektori, soliq xodimi va ijtimoiy xodim) faoliyatini samarali tashkil etish maqsadida tegishli normativ hujjatlarning mazmun-mohiyatini tez va qulay usulda yetkazish hamda kasbiy bilim va ko‘nikmalarini oshirishga qaratilgan elektron dastur — Quiz bot ishlab chiqilgan.

Mazkur bot tumandagi barcha mahalla yettiliklari e’tiboriga yetkazilib, ular tomonidan ko‘rsatilgan manzil orqali so‘rovnomalarni to‘ldirish ta’minlandi.

Mamlakatimizda tinchlik va osoyishtalikni ta’minlashning mutlaqo yangi mexanizmlarini joriy etish, huquqbuzarlik sodir etilishiga sabab bo‘layotgan ijtimoiy-maishiy muammolarni ijtimoiy profilaktika choralari tizimi orqali hal etish hamda aholida shaxsiy xavfsizlik hissini shakllantirish borasida samarali chora-tadbirlar amalga oshirilmoqda.

O‘zbekiston Respublikasi Prezidentining 2026-yil 16-fevraldagi “Mahallani rivojlantirish va jamiyatni yuksaltirish” yilida ustuvor yo‘nalishlar bo‘yicha islohotlar dasturlari va “O‘zbekiston – 2030” strategiyasini amalga oshirish bo‘yicha davlat dasturi to‘g‘risidagi PF-22-sonli Farmonida belgilangan ustuvor maqsadlarga erishish, shuningdek mas’ul davlat organlari va tashkilotlarining mahallalarda huquqbuzarliklar profilaktikasi sohasidagi faoliyatini yangi bosqichga olib chiqishga xizmat qilmoqda.

Aholining huquqiy ongi va madaniyatini oshirish, ma’naviy-axloqiy fazilatlarini yuksaltirish hamda tarbiyalashga qaratilgan targ‘ibot-tashviqot tadbirlari ham izchil amalga oshirilmoqda.

Bugungi kunda ushbu yo‘nalishdagi ishlar alohida nazoratga olingan holda davom ettirilmoqda.

Aziz paxtakorliklar!

Albatta, tumanimizda jinoyatchilik va korrupsiyaning oldini olishda, umuman barcha sohalarda qonuniylikni ta’minlashda, eng avvalo, mahalla ahli, yoshlar va nuroniylar tashkilotlari faollariga, turli mehnat jamoalaridagi fidoyi va vatanparvar insonlarga, ularning amaliy yordami va hamkorligiga tayanamiz.