Jizzax viloyati Paxtakor tumani hokimligi

Vazirlar Mahkamasining 17.12.2025 yildagi "Aholiga davlat ijtimoiy sug‘urtasi bo‘yicha to‘lovlarni amalga oshirish tizimini takomillashtirishning qo‘shimcha chora-tadbirlari to‘g‘risida"gi 796-son qarori qabul qilindi.

 

Prezidentning 03.11.2025 yildagi PF-206-son Farmoniga muvofiq 2026 yil 1 yanvardan boshlab davlat ijtimoiy sug‘urtasining yangi tizimi joriy etiladi. Bunda to‘lovlar fuqarolarga ularning eng kam sug‘urta stajiga va Prezident huzuridagi Ijtimoiy himoya milliy agentligining Davlat ijtimoiy sug‘urtasi jamg‘armasi orqali to‘langan sug‘urta badaliga mutanosib ravishda to‘lanadi.

 

Hujjat bilan quyidagilar tasdiqlangan:

•  Prezident huzuridagi Ijtimoiy himoya milliy agentligining Davlat ijtimoiy sug‘urtasi jamg‘armasi to‘g‘risidagi nizom;

•  Jamg‘arma Kuzatuv kengashining tarkibi;

•  Jamg‘arma Ijro etuvchi direksiyasining tuzilmasi;

•  Davlat ijtimoiy sug‘urtasi doirasida vaqtincha mehnatga layoqatsizlik hamda homiladorlik va tug‘ish nafaqalarini tayinlash hamda to‘lash tartibi to‘g‘risidagi nizom.

 

Jamg‘arma orqali proaktiv shaklda homiladorlik va tug‘ish nafaqasi (2026 yil 1 yanvardan) hamda vaqtincha mehnatga layoqatsizlik nafaqasi (2026 yil 1 iyuldan) tayinlanadi va to‘lanadi.

 

Fuqarolarni davlat ijtimoiy sug‘urtasi bilan qamrab olish quyidagi shartlarda amalga oshiriladi:

•  majburiy asoslarda – stavkasi Davlat byudjeti to‘g‘risidagi qonun bilan belgilanadigan JSHDSning bir qismi hisobiga;

•  ixtiyoriylik asosida – MHTEKMning 5 foizi miqdoridagi har oylik sug‘urta badalining eng kam miqdorini to‘lash hisobiga.

 

Sug‘urtalangan shaxslar, ularning sug‘urta staji va badallari hisobini yuritish, shuningdek, davlat ijtimoiy sug‘urtasi bo‘yicha to‘lovlarni tayinlash va to‘lash jarayonlari "Raqamli hukumat" tizimining Idoralararo integratsiyalashuv platformasi orqali olinadigan ma’lumotlar asosida Ijtimoiy himoya milliy agentligining axborot tizimida amalga oshiriladi.

 

Nizomga muvofiq sug‘urta hodisasi yuz berganda sug‘urtalangan shaxslarga to‘lovlar quyidagi shartlar asosida tayinlanadi:

– davlat ijtimoiy sug‘urtasi bo‘yicha to‘lovlarni olish huquqi, agar sug‘urta hodisasi:

•  sug‘urtalangan shaxslar ish beruvchi bilan mehnat munosabatlarida bo‘lgan davrda;

•  yuridik yoki jismoniy shaxslar bilan tuzilgan fuqarolik-huquqiy tusdagi shartnomalar asosida xizmatlar ko‘rsatish davrida;

•  qonun hujjatlarida belgilangan tartibda boshqa rasmiy faoliyat bilan shug‘ullanish davrida.

– agar sug‘urta staji homiladorlik va tug‘ish nafaqasini olish uchun kamida 10 oyni va vaqtincha mehnatga qobiliyatsizlik nafaqasini olish uchun kamida 6 oyni tashkil etsa.

 

Vaqtincha mehnatga qobiliyatsizlik nafaqasini to‘lash mehnatga qobiliyatsizlik varaqasida ko‘rsatilgan butun davr uchun, biroq bir kalendar yil mobaynida 182 kalendar kundan ortiq bo‘lmagan davr uchun amalga oshiriladi.

 

Homiladorlik va tug‘ish nafaqasi miqdorini hisoblashda o‘rtacha oylik ish haqiga sug‘urtalangan shaxsning sug‘urta stajiga mutanosib ravishda staj koeffisiyenti qo‘llaniladi. Bunda nafaqa to‘lash sug‘urta stajiga bog‘liq:

•  10 oydan 24 oygacha (24 oy ham kiradi) – 75%;

•  25 oydan 60 oygacha (60 oyni ham qo‘shib hisoblaganda) – 85%;

•  61 oydan boshlab – 100%.

 

Sug‘urtalangan shaxslarga davlat ijtimoiy sug‘urtasi bo‘yicha tayinlangan to‘lovlarni to‘lash moliya agenti tomonidan amalga oshiriladi.

 

Paxtakor tumani “Inson” ijtimoiy xizmatlar markazi