Jizzax viloyati Paxtakor tumani hokimligi

Hurmatli zobitlar va askarlar!

Muhtaram mexmonlar hamda tadbir ishtirokchilari!

 

Bugun yurtimizda O‘zbekiston Respublikasi Qurolli Kuchlari tashkil etilganining 34 yilligi va 14 yanvar “Vatan himoyachilari kuni” shodu-xurramlik bilan keng nishonlanmoqda.

Shu munosabat bilan, Avvalo, Siz azizlarni, sizlar orqali butun tumanimizning mard, jasur posbonlarini O‘zbekiston Respublikasi Qurolli Kuchlari tashkil etilganining 34 yilligi va “Vatan himoyachilari kuni” bilan chin qalbimdan samimiy muborakbod etaman!

Ushbu qutlug‘ ayyomda o‘z hayotini Vatan himoyasidek ulug‘ ishga bag‘ishlagan siz, azmu shijoatli harbiylarimizni sharaflab, xalqimiz, mamlakatimiz hamda tumanimiz tinchligi va xavfsizligi yo‘lidagi xizmatlaringiz uchun barchangizga chuqur minnatdorlik bildiraman.

 

Hurmatli bayram tadbiri ishtirokchilari!

 

O‘zbekiston Respublikasi Prezidentining 2025 yil 1 dekabrdagi “O‘zbekiston Respublikasi Qurolli Kuchlari tashkil etilganining 34 yilligi hamda 14 yanvar Vatan himoyachilari kunini nishonlashga tayyorgarlik ko‘rish va o‘tkazish chora-tadbirlari to‘g‘risida”gi F-70-sonli farmoyishiga muvofiq “Milliy armiya - Ona yurt qalqoni, tinchligimiz posboni” degan ezgu g‘oya asosida Qurolli Kuchlarimizning jangovar salohiyatini oshirish, uning saflarida xizmat qilish tom ma’noda shon-sharaf ishiga aylanib bormoqda.

Mutafakkir shoir Alisher Navoiy bobomiz aytganlaridek, bu dunyoda er yigitning eng buyuk, ezgu va muqaddas vazifasi, avvalo, o‘z oilasi, Vatani va xalqini munosib himoya qilishdir.

Qadrli, mard va jasur Vatan himoyachilari!

 

Vatan tinchligini saqlash, jamiyat jipsligi, osoyishtaligiga munosib hissa qo‘shish, –har bir mard o‘g‘lonning Vatani oldidagi muqaddas burchidir.

Biz sizlar bilan - ana shunday g‘oyat mas’uliyatli va olijanob vazifani sharaf bilan ado etib kelayotgan sadoqatli o‘g‘lonlarimiz bilan haqli ravishda faxrlanamiz.

Aynan sizlarning yerda va ko‘kda, suvda va quruqlikda olib borayotgan mardona xizmatlaringiz tufayli osmonimiz musaffo, bolalarimiz, moʻtabar onalarimiz, keksalarimiz xotirjam yashamoqda, yurtimiz obod, xalqimiz hayoti farovon bo‘lmoqda.

Milliy armiyamizning kuch-qudrati - azmu shijoatli va har ishda yetuk salohiyatli harbiy xizmatchilarimizning, bag‘rikeng va olijanob xalqimizning birligi va hamjihatligidadir.

Ishonchim komilki, ana shunday buyuk ma’naviy qudrat manbai bor ekan, el-yurtimizning tinch va osoyishta hayoti, Vatanimiz mustaqilligiga hech qanday yovuz kuch rahna sololmaydi, demokratik islohotlarimiz yo‘lidan hech qachon ortga qaytara olmaydi.

Fursatdan foydalanib, tumanimizning turli go‘shalaridan Qurolli Kuchlarimiz saflarida xizmat qilayotgan qo‘rqmas va haqiqiy vatanparvar askar va ofiserlarning ota-onalariga, yaqinlariga ulkan minnatdorchilik bildiraman.

Bugun nafaqat qurolli kuchlarimiz safida xizmat qilayotgan askarlarimiz, balki tumanimiz rivoji, ravnaqi yo‘lida kechani -kecha, kunduzni- kunduz demay biz bilan yelkama-yelka turib, fidokorona mehnat qilib kelayotgan barcha soha vakillari ham o‘z o‘rnida Vatan himoyachisi hisoblanadi.

Shu fursatdan foydalanib, oila qo‘rg‘onining mustahkam ustuni hisoblangan barcha erkaklarni, tumanimizga tog‘dek tayanch bo‘lib turgan mard o‘g‘lonlarimizni  yana bir bor muborakbod etaman!

Bugungi ulug‘ ayyomda sizlarning ham Vatanimizning mudofaa qudratini oshirishda munosib hissangiz borligini yana bir bor katta mamnuniyat bilan e’tirof etaman!

 

Hurmatli mard va jasur Vatan himoyachilari!

Yurt posbonlari!

 

Ushbu qutlug‘ ayyomda fidokorona xizmatlaringizni alohida ta’kidlab, sizlarning faol sa’y-harakatlaringiz bilan O‘zbekiston armiyasi izchil rivojlanib borayotganini, uning jangovar qobiliyati ortib, mudofaa qudratimiz mustahkamlanayotgani, xalqimizning osoyishta hayoti ta’minlanayotganini yana bir bor yuksak g‘urur bilan e’tirof etamiz.

Fursatdan foydalanib, ana shunday samarali xizmatlaringiz uchun sizlarga, moʻtabar tuprog‘imizni ko‘z qorachig‘idek asrab-avaylash yo‘lida olijanob va mas’uliyatli burchini munosib ado etib kelayotgan barcha jasur Vatan himoyachilariga chin dildan minnatdorlik bildiraman.

Barchangizni O‘zbekiston Qurolli Kuchlari tashkil etilganining shonli 34 yilligi va 14 yanvar Vatan himoyachilari kuni bilan yana bir bor samimiy tabriklayman.

Sizlarga mustahkam sog‘lik, oilaviy baxt-saodat, tinchlik va farovonlik tilayman.

Xalqimizning yuksak ishonchi va hurmat-ehtiromi sizlarga hamisha yor bo‘lsin!

Yurtimiz tinch, osmonimiz musaffo, sarhadlarimiz mustahkam, xalqimiz farovon bo‘lsin!  

 

      Bayramingiz muborak bo‘lsin, aziz Vatan himoyachilari!