Paxtakor tumanida yangi dam olish makoni barpo etilmoqda
2025-12-04 17:00:00 / Yangiliklar
Paxtakor tumani Samarqand mahallasi hududida, Janubiy Mirzacho‘l kanalining so‘lim bo‘yida barpo etilayotgan “Sohil Bo‘yi” aholi dam olish maskanida qurilish ishlari jadallik bilan davom etmoqda.
Mazkur loyiha aholining bo‘sh vaqtini mazmunli o‘tkazishi, hududning sayyohlik salohiyatini oshirish va ekologik jihatdan qulay muhit yaratish maqsadida amalga oshirilmoqda. Hozirda hududda piyodalar yo‘laklari, dam olish pavilyonlari, yoritish tizimlari hamda bolalar maydonchalari uchun zamonaviy infratuzilma barpo etilmoqda.
Rejaga ko‘ra, maskan aholiga vaqtni maroqli o‘tkazish, sport bilan shug‘ullanish va tabiat bag‘rida hordiq chiqarish uchun qulay sharoitlarga ega bo‘ladi. Kanal bo‘yidagi hududning obodonlashtirilishi tumanning yanada jozibador bo‘lishiga xizmat qiladi.
“Sohil Bo‘yi” dam olish maskani ishga tushgach, Paxtakor aholisi uchun yangi ijtimoiy makon, mehmonlar uchun esa mazali hordiq joyiga aylanadi.