Jizzax viloyati Paxtakor tumani hokimligi

Paxtakor tuman rahbari sanoat va ishlab chiqarish korxonalari faoliyati bilan tanishdi

Paxtakor tumani hokimi vazifasini bajaruvchi Xusan Abduvoxidov hamda mutasaddilar tuman hududida faoliyat yuritayotgan bir qator yirik ishlab chiqarish korxonalarida bo‘lib, ularning faoliyati bilan yaqindan tanishdilar.

Tashrif avvalida rahbariyat “Paxtakor Teks” qo‘shma korxonasida yaratilgan ish o‘rinlari, ishlab chiqarish jarayoni va eksport salohiyatini o‘rgandi. Korxona xodimlari bilan muloqotda mehnat sharoitlari, xodimlar uchun yaratilgan imkoniyatlar hamda mahsulot sifati masalalari muhokama qilindi.

Shuningdek, tumanning “G‘alaba” mahallasida joylashgan, avtomobillar uchun ehtiyot qismlar va texnik suyuqliklar ishlab chiqarishga ixtisoslashgan “WORLD TRADING COMPANY” MChJ qo‘shma korxonasida ham bo‘linib, uning texnologik quvvatlari, ishlab chiqarish salohiyati va mavjud muammolari atroflicha o‘rganildi. Korxonada ishlab chiqarishni kengaytirish, ichki va tashqi bozordagi raqobatbardoshlikni oshirish bo‘yicha takliflar ko‘rib chiqildi.

Tashrif doirasida tuman hokimi va tuman prokurori urug‘chilikka ixtisoslashgan “SEMRUG‘ CLUSTER” MChJ faoliyati bilan ham tanishdi. Urug‘chilik klasterida amalga oshirilayotgan jarayonlar, eksport bo‘yicha ko‘rsatkichlar, shuningdek hozirgi kunda yechimini kutayotgan masalalar muhokama etildi. Korxonaning eksport jarayonidagi ayrim to‘siqlarni bartaraf etish bo‘yicha mutasaddilar bilan suhbatlar olib borildi.

Tashriflar davomida tuman rahbari sanoat subyektlari faoliyatini qo‘llab-quvvatlash, ishlab chiqarishni kengaytirish, yangi ish o‘rinlari yaratish va eksport ko‘rsatkichlarini oshirish bo‘yicha zarur topshiriqlar berdi.