💧 Paxtachida suv resurslaridan samarali foydalanish bo‘yicha ishlar o‘rganildi
2026-09-19 09:05:00 / Yangiliklar
O‘zbekiston Respublikasi Vazirlar Mahkamasining 2026-yil 19-martdagi “Irrigatsiya tizimlarida suv resurslaridan oqilona foydalanish hamda suv tanqisligining oldini olishga qaratilgan chora-tadbirlar to‘g‘risida”gi 111-son qarori ijrosi doirasida Paxtachi tumanida amaliy ishlar olib borilmoqda.
Mazkur qarorning 2-ilovasiga muvofiq, Samarqand viloyati Paxtachi tumanida 1 gektar maydonda 100 ming kub metr sig‘imga ega suv to‘plovchi hovuz qurish bo‘yicha topshiriq belgilangan.
Ushbu topshiriq ijrosi doirasida Qo‘shhovuz mahallasi hududida suv tejovchi texnologiyalardan foydalangan holda sug‘orish maqsadida suv to‘plovchi hovuz qurilishi boshlandi. Ayni paytda hovuzni qazish ishlari yakunlanish arafasida.
Qurilish jarayonining borishi bilan yaqindan tanishish maqsadida O‘zbekiston Respublikasi Suv xo‘jaligi vaziri o‘rinbosari Rustam Jurayevich Qarishev Paxtachi tumanida bo‘ldi.
Tashrif davomida amalga oshirilayotgan ishlar yuzasidan Paxtachi tumani hokimi Qayum Xushbakov hamda tuman Suv yetkazib berish xizmati DM direktori Doston Abdurahimov tomonidan ma’lumot berildi.
Shuningdek, vazir o‘rinbosari Fay mahallasida Narpay kanali bo‘yida barpo etilayotgan dam olish maskani bilan tanishdi. Suv havzalaridan samarali foydalanish imkoniyatlarini kengaytirish yuzasidan tuman mutasaddilariga tegishli taklif va tavsiyalar berildi.
Tashrif davomida Paxtachi tumani hokimi Qayum Xushbakov va vazir o‘rinbosari R. Qarishev tomonidan suv resurslaridan samarali foydalanish hamda kelgusida amalga oshiriladigan ishlar yuzasidan fikr almashildi.
💧 Suvni tejash va undan oqilona foydalanish — barqaror taraqqiyot garovi!