🏠 Boshpanasiz shaxslarni vaqtinchalik boshpana bilan ta’minlash tartibi belgilandi
2026-09-15 11:30:00 / Yangiliklar
O‘zbekiston Respublikasi Hukumatining 2026-yil 18-avgustdagi 447-son qarori bilan muayyan yashash joyiga ega bo‘lmagan shaxslarni Vaqtinchalik boshpana va ijtimoiy tiklanish markaziga joylashtirish bo‘yicha davlat xizmatini ko‘rsatishning ma’muriy reglamenti tasdiqlandi.
📌 Reglamentga ko‘ra:
🔹 Ichki ishlar organlari xodimlari hamda mahallalarda kompleks ijtimoiy xizmatlar ko‘rsatuvchi ijtimoiy xodimlar tomonidan ko‘cha, vokzal, bozor, yer osti yo‘laklari, yashash uchun mo‘ljallanmagan binolar va boshqa jamoat joylarida muayyan yashash joyiga ega bo‘lmagan shaxslar aniqlanadi.
🔹 Aniqlangan shaxslarga Markaz xizmatlaridan foydalanish taklif etiladi.
🔹 Voyaga yetgan muayyan yashash joyiga ega bo‘lmagan shaxs Markazga joylashtirish uchun bevosita murojaat qiladi. Agar uning voyaga yetmagan farzandlari mavjud bo‘lsa, ular shaxs bilan birgalikda joylashtiriladi.
🩺 Tibbiy ko‘rik ham majburiy tartibda amalga oshiriladi. Muayyan yashash joyiga ega bo‘lmagan shaxslar tuman yoki shahar darajasidagi tibbiyot muassasalarining shoshilinch qabul bo‘limlarida tibbiy ko‘rikdan o‘tkaziladi.
Shaxsda Markazga joylashtirishga monelik qiluvchi shoshilinch va kechiktirib bo‘lmaydigan tibbiy yordamga ehtiyoj yoki yuqumli kasalliklar mavjud bo‘lmasa, u Markazga qabul qilinadi.
📋 So‘rovnoma shakllantirilgach, shaxs 7 kun muddatga Markazga joylashtiriladi. Qonunchilikda belgilangan ayrim holatlarda Markazda qolish muddati 6 oygacha uzaytirilishi mumkin.
Shuningdek, so‘rovnomani to‘ldirish uchun zarur ma’lumotlarni taqdim etish shaxsning Markazga joylashtirishga hamda uning ichki tartib-qoidalariga rioya etishga roziligini bildiradi.
🤝 Inson qadrini ulug‘lash va ijtimoiy himoyaga muhtoj fuqarolarni qo‘llab-quvvatlash — jamiyatimizning muhim vazifalaridan biridir.
Paxtachi tuman adliya bo‘limi
Yuridik xizmat ko‘rsatish markazi boshlig‘i
Sh. Abdumurotov