⚡️ Keshtali mahallasida universal sport maydonchasi foydalanishga topshirildi
2026-09-10 12:00:00 / Yangiliklar
2025-yilda “Besh tashabbus olimpiadasi” doirasida mahalla yoshlari o‘rtasida gimnastrada bo‘yicha Respublika bosqichida Qoraqalpog‘iston Respublikasi, Toshkent shahri va barcha viloyatlardan 150 nafardan ortiq qizlar ishtirok etgan edi.
Mazkur musobaqada Samarqand viloyati sharafini himoya qilgan Paxtachi tumani Keshtali mahallasining gimnastradachi qizlari yuksak natija qayd etib, Respublika bosqichida 1-o‘rinni qo‘lga kiritgan edi.
🏆 Ushbu g‘alaba munosabati bilan Sport vazirligi tomonidan Keshtali mahallasida, 30-sonli umumta’lim maktabi hududida universal sport maydonchasi barpo etilib, mahalla ahliga tuhfa qilindi.
Bugun, 10-sentyabr kuni, mazkur sport maydonchasining ochilish marosimi bo‘lib o‘tdi. Unda Paxtachi tumani hokimi o‘rinbosari D. Napasov, yoshlar, nuroniylar hamda jamoatchilik vakillari ishtirok etdi.
Ta’kidlash joizki, gimnastradachi qizlarimiz nafaqat sportdagi yuksak mahorati va qat’iyati, balki o‘z mahallasining rivojiga qo‘shayotgan munosib hissi bilan ham barchaga o‘rnak bo‘lmoqda.
Yangi universal sport maydonchasi yoshlarning bo‘sh vaqtini mazmunli tashkil etish, ommaviy sportni rivojlantirish hamda kelgusida yangi sport yutuqlarini qo‘lga kiritishlari uchun muhim imkoniyat yaratadi.
🌟 G‘alaba — yangi imkoniyatlar eshigini ochadi!
🏆 Sportdagi yutuq — mahalla taraqqiyotiga xizmat qilmoqda!