BRIFING Uyushmagan yoshlarni sport-sog‘lomlashtirish tadbirlariga jalb qilish holati hamda “Besh tashabbus olimpiadasi” doirasida ro‘yxatdan o‘tkazish ishlari
2026-03-30 15:05:00 / Matbuot anjumanlari
Ma’ruzachi: Tuman Yoshlar ishlari bo‘limi boshlig‘i Muhammadiyev O‘ktam Eshmamatovich
Hurmatli yig‘ilish ishtirokchilari!
Bugungi brifingimizda tumanimizda uyushmagan yoshlarni sport-sog‘lomlashtirish tadbirlariga jalb qilish borasida amalga oshirilayotgan ishlar hamda “Besh tashabbus olimpiadasi” doirasida ro‘yxatdan o‘tkazish jarayonlari haqida ma’lumot berib o‘taman.
Avvalo, yoshlarni sog‘lom turmush tarziga yo‘naltirish, ularning bo‘sh vaqtini mazmunli tashkil etish maqsadida tumanimizda keng ko‘lamli ishlar olib borilmoqda. Mahallalarda sport musobaqalari, sog‘lomlashtirish tadbirlari hamda turli sport to‘garaklari tashkil etilib, ayniqsa uyushmagan yoshlarni jalb etishga alohida e’tibor qaratilmoqda.
Yoshlar yetakchilari tomonidan har bir mahallada uyushmagan yoshlar bilan manzilli ishlar olib borilib, ularning qiziqishlari o‘rganilmoqda hamda sport va boshqa foydali yo‘nalishlarga yo‘naltirilmoqda.
Shuningdek, “Besh tashabbus olimpiadasi” doirasida yoshlarni ro‘yxatdan o‘tkazish ishlari tizimli ravishda amalga oshirilmoqda. Bugungi kunga qadar tumanimizda jami 58 858 nafar yosh maxsus platforma orqali ro‘yxatdan o‘tkazildi.
Shundan:
sport yo‘nalishi bo‘yicha — 44 307 nafar,
zamonaviy kasblar yo‘nalishi bo‘yicha — 1 945 nafar,
madaniyat va san’at yo‘nalishi bo‘yicha — 3 218 nafar,
kitobxonlik yo‘nalishi bo‘yicha — 2 998 nafar,
kibersport yo‘nalishi bo‘yicha — 2 824 nafar,
intellektual o‘yinlar yo‘nalishi bo‘yicha — 2 761 nafar,
adaptiv yo‘nalish bo‘yicha — 805 nafar yosh ro‘yxatdan o‘tib, ushbu yo‘nalishlarga qiziqish bildirgan.
Mazkur ko‘rsatkichlar yoshlarimizning turli sohalarga bo‘lgan qiziqishi ortib borayotganini, ayniqsa sport yo‘nalishi yetakchi o‘rinda ekanini ko‘rsatmoqda.
Xulosa o‘rnida, kelgusida uyushmagan yoshlarni to‘liq qamrab olish, ularni sport-sog‘lomlashtirish tadbirlariga keng jalb etish hamda “Besh tashabbus olimpiadasi” doirasidagi ishtirokni yanada oshirish ustuvor vazifamiz bo‘lib qoladi.
Barchangizni ushbu yo‘nalishdagi ishlarni yanada jadallashtirishga chaqirib qolaman.
E’tiboringiz uchun rahmat!