Brifing: “Konstitutsiya — inson qadri, erkinlik, tenglik va adolat garovi!”
2025-11-27 16:00:00 / Rahbariyatning bayonotlari va nutqlari
Assalomu alaykum hurmatli ijtimoiy tarmoq kuzatuvchilari!
Bugungi brifing mavzuyimiz: “Konstitutsiya — inson qadri, erkinlik, tenglik va adolat garovi!”
Bugun biz yurtimiz taraqqiyoti va fuqarolarimiz farovonligining mustahkam poydevori bo‘lgan muhim mavzu — O‘zbekiston Respublikasi Konstitutsiyasi, uning mazmun-mohiyati va asosiy tamoyillari haqida so‘z yuritamiz.
O‘zbekiston Respublikasi Konstitutsiyasi — davlatimizning eng oliy huquqiy hujjati, jamiyatimiz boshqaruv tizimining poydevoridir. 1992-yil 8-dekabrda qabul qilingan bu hujjat mamlakatimizda demokratik tamoyillarni mustahkamladi va inson huquqlari hamda erkinliklarini eng oliy qadriyat sifatida e’lon qildi.
Konstitutsiya davlat tuzilishini, hokimiyat vakolatlarini, fuqarolarning huquq va majburiyatlarini belgilab, jamiyatda qonun ustuvorligini ta’minlaydi. Unda xalq davlat hokimiyatining yagona manbai, davlat organlari esa xalq manfaatiga xizmat qilishi shartligi qayd etilgan. Shu bilan birga, har bir fuqaroning sha’ni, qadr-qimmati, erkinligi va tengligi daxlsiz deb hisoblanadi.
Inson qadri eng oliy tamoyil sifatida e’tirof etilgan. Har bir fuqaro ta’lim olish, mehnat qilish, tibbiy xizmatlardan foydalanish va munosib hayot kechirish huquqiga ega.
Erkinlik tamoyili esa har bir insonning fikr, so‘z, e’tiqod va tadbirkorlik erkinligini kafolatlaydi. Bu erkinliklar demokratik jamiyatning ajralmas qismidir.
Tenglik tamoyili barcha fuqarolarni tug‘ilgan joyi, jinsi, millati, dini yoki ijtimoiy kelib chiqishidan qat’i nazar, teng huquqlarga ega ekanligini belgilaydi. Har qanday kamsitish qonun bilan taqiqlangan. Davlat erkaklar va ayollar tengligini, nogironligi bo‘lgan shaxslar uchun qulay sharoitlarni ta’minlashni ustuvor vazifa sifatida olgan.
Adolat tamoyili esa huquqiy davlatning yuragi bo‘lib, sud hokimiyatining mustaqilligi, aybsizlik prezumpsiyasi va qonun oldida barcha fuqaroning tengligi bilan ta’minlanadi. Bu jamiyatda ishonch va barqarorlikni mustahkamlaydi.
Xulosa qilib aytganda, Konstitutsiya — inson qadri, erkinlik, tenglik va adolat garovidir. Biz barchamiz ushbu tamoyillarga sodiq qolish, Konstitutsiyaga hurmat bilan yondashish orqali yurtimiz ravnaqiga munosib hissa qo‘shamiz.
E’tiborlaringiz uchun tashakkur!