“Xotin-qizlarga nisbatan raqamli zo‘ravonlikka barham berish uchun birlashaylik!”
2025-11-26 14:25:00 / Yangiliklar
Har yili 25-noyabr – Xotin-qizlarga nisbatan zo‘ravonlikka barham berish xalqaro kunidan boshlab 10 dekabr – Inson huquqlari kuniga qadar dunyo bo‘ylab “Gender asosidagi zo‘ravonlikka qarshi 16 kunlik faollik” global kampaniyasi o‘tkaziladi.
(https://t.me/xqnamvil/12786)
Paxtachi tumanida “Xotin-qizlarga nisbatan raqamli zo‘ravonlikka barham berish uchun birlashaylik” shiori ostida respublika miqyosida targ‘ibot tadbirlariga start berilishi munosabati bilan mazkur tashabbusning mazmun-mohiyati va amaliy ahamiyatini targ‘ib etishga qaratilgan seminar tashkil etildi.
Seminar ishtirokchilari mahallalar raislari va xotin-qizlar faollariga, xotin-qizlarga nisbatan raqamli makonda uchrayotgan zo‘ravonlik holatlari — jumladan, kiberbulling, shaxsiy ma’lumotlarni ruxsatsiz tarqatish, onlayn ta’qib va tahdid kabi noqonuniy harakatlar yuzasidan Paxtachi tumani IIB JXX XPB xotin-qizlar masalalari bo‘yicha katta inspektori kapitan N.M.Mamadisayeva tomonidan batafsil ma’lumotlar berildi.
Shuningdek, raqamli zo‘ravonlikning oldini olishga qaratilgan normativ-huquqiy baza, mavjud himoya mexanizmlari, aholi, ayniqsa xotin-qizlarning raqamli savodxonligini oshirishga doir tashkiliy-amaliy chora-tadbirlar muhokama qilindi. Mutasaddilar tomonidan profilaktika ishlarini kuchaytirish, onlayn xavfsizlik bo‘yicha o‘quv dasturlarini takomillashtirish hamda aholining axborot madaniyatini oshirish yuzasidan aniq taklif va tavsiyalar bildirildi.
Mazkur tashabbus xotin-qizlarning raqamli makondagi huquq va erkinliklarini ishonchli himoya qilish, ularning xavfsiz hayot faoliyatini ta’minlash hamda jamiyatda raqamli madaniyatni rivojlantirishga qaratilgan kompleks ishlarning muhim bosqichi hisoblanadi.
“Xotin-qizlarga nisbatan raqamli zo‘ravonlikka barham berish uchun birlashaylik!” 16 kunlik faol kampaniya tadbirlari davom etmoqda.