Sirdaryo viloyati Oqoltin tuman hokimligi

Oqoltin tumanida davlat xizmatlari ko‘rsatish tizimini takomillashtirish, aholiga tez, shaffof va qulay xizmatlar taqdim etish borasida amalga oshirilayotgan ishlar yuzasidan tuman Adliya bo‘limi tomonidan press-tur tashkil etildi.

Tadbirda ommaviy axborot vositalari vakillari ishtirok etib, tuman Davlat xizmatlari markazida yaratilgan shart-sharoitlar, xizmat ko‘rsatish tartibi, xodimlarning faoliyati bilan yaqindan tanishdilar.

Ta’kidlash joizki, Oqoltin tuman Davlat xizmatlari markazi bugungi kunda fuqarolarga 442 turdagi davlat xizmatlarini "Bir darcha" tamoyili asosida ko‘rsatmoqda. Bu esa fuqarolarning ortiqcha sarson bo‘lmasligi, ortiqcha hujjatlar talab qilinmasligi, eng muhimi — vaqt tejalishini ta’minlamoqda.

Adliya bo‘limi mas’ullarining ta’kidlashicha, 2025-yilning birinchi yarmida markaz tomonidan aholiga ko‘rsatilgan xizmatlar soni keskin oshgan, ayniqsa elektron xizmatlarga murojaatlar soni ortib bormoqda.

Press-tur davomida mehmonlarga Davlat xizmatlari markazida tashkil etilgan elektron navbat tizimi, o‘z-o‘ziga xizmat ko‘rsatish burchagi, mobil ilovalar orqali murojaat qilish imkoniyatlari, nogironligi bo‘lgan shaxslar uchun yaratilgan qulayliklar, xizmatlar tezligi va sifatini baholash tizimi haqida batafsil ma’lumot berildi.

Shuningdek, aholiga yaqin bo‘lish maqsadida markaz xodimlari tomonidan mahallalarda sayyor xizmatlar, mobil davlat xizmatlari avtobusi orqali xizmat ko‘rsatish, hamda onlayn huquqiy maslahatlar berish amaliyoti yo‘lga qo‘yilgan.

Adliya bo‘limi boshlig‘i press-tur yakunida fuqarolarga xizmat ko‘rsatishda asosiy maqsad — “Xalq davlat idoralariga emas, davlat idoralari xalq oldiga borishi kerak” degan tamoyil asosida ishlash ekanligini ta’kidladi.