Oqoltin tumani hokimi Xusnitdin Suvonovning 30-iyun – Yoshlar kuni munosabati bilan bayram tabrigi
2026-06-30 10:50:00 / Rahbariyatning bayonotlari va nutqlari
Assalomu alaykum, aziz yoshlar! Hurmatli ustozlar, ota-onalar, nuroniylar va festival ishtirokchilari!
Avvalo, barchangizni yurtimizda katta shodiyona va yuksak ko‘tarinkilik bilan nishonlanayotgan 30-iyun – Yoshlar kuni munosabati bilan chin qalbimdan samimiy muborakbod etaman.
Bugun Yangi O‘zbekiston taraqqiyotining eng muhim tayanchi bo‘lgan yoshlarimiz sharafiga tashkil etilgan ushbu festivalda sizlar bilan bir davrada bo‘lib turganimdan cheksiz mamnunman.
Muhtaram Prezidentimiz Shavkat Mirziyoyev taʼkidlaganlaridek, “Yoshlar – Yangi O‘zbekiston bunyodkorlari”. Darhaqiqat, bugungi kunda mamlakatimizda yoshlarning bilim olishi, kasb-hunar egallashi, o‘z isteʼdod va salohiyatini ro‘yobga chiqarishi, zamonaviy kasblarni egallashi, tadbirkorlik bilan shug‘ullanishi hamda sport va madaniyat sohalarida yuksak marralarni zabt etishi uchun barcha sharoit va imkoniyatlar yaratilmoqda.
Biz Oqoltin tumanida ham yoshlarni har tomonlama qo‘llab-quvvatlash, ularning bandligini taʼminlash, tashabbuslarini ro‘yobga chiqarish, iqtidorli va faol yigit-qizlarni rag‘batlantirish masalalariga alohida eʼtibor qaratmoqdamiz. Yoshlarimizning taʼlim, sport, madaniyat, tadbirkorlik va innovatsiyalar sohalarida erishayotgan yutuqlari bizni quvontiradi va kelajakka bo‘lgan ishonchimizni yana-da mustahkamlaydi.
Aziz yoshlar!
Sizlar mamlakatimizning ertangi kuni, xalqimizning eng katta boyligi va ishonchisiz. Sizlardan Vatanga sadoqatli, bilimli, tashabbuskor, zamonaviy fikrlaydigan va yuksak maʼnaviyatli insonlar bo‘lib kamol topishingizni kutamiz. Biz esa sizlarning har bir ezgu tashabbusingizni qo‘llab-quvvatlash, orzu va maqsadlaringizni amalga oshirish yo‘lida doimo yoningizda bo‘lamiz.
Bugungi bayram munosabati bilan ilm-fan, sport, madaniyat, tadbirkorlik hamda jamoat ishlarida alohida faollik ko‘rsatib kelayotgan barcha yoshlarimizga o‘z minnatdorligimni bildiraman. Ishonchim komilki, sizlarning yutuqlaringiz Oqoltin tumani va Yangi O‘zbekiston taraqqiyotiga munosib hissa bo‘lib qo‘shiladi.
Yana bir bor barchangizni Yoshlar kuni bilan chin qalbimdan tabriklayman!
Barchangizga mustahkam sog‘lik, oilaviy baxt-saodat, o‘qish va mehnat faoliyatingizda ulkan muvaffaqiyatlar, ezgu maqsadlaringiz yo‘lida kuch-g‘ayrat va omad tilayman.
Bayramingiz muborak bo‘lsin, aziz yoshlar!