Sirdaryo viloyati Oqoltin tuman hokimligi

Oqoltin tuman hokimining birinchi o‘rinbosari Muzaffar Xomidjanov ishtirokida tumanda yoshlar siyosati hamda yoshlar bandligini ta'minlash borasida amalga oshirilgan ishlar yuzasidan matbuot anjumani bo‘lib o‘tdi.

Anjumanda ta'kidlanganidek, Prezidentimiz tomonidan yoshlarga oid davlat siyosati doirasida belgilab berilgan ustuvor vazifalar ijrosini ta'minlash, yoshlarning bandligini oshirish, ularni tadbirkorlikka jalb etish, huquqbuzarlik va jinoyatchilikning oldini olish hamda ijtimoiy qo‘llab-quvvatlash bo‘yicha tumanda tizimli ishlar olib borilmoqda.

Joriy yil boshida o‘tkazilgan xatlov natijalariga ko‘ra, tumanning 11 ta mahallasida 128 nafar ishsiz yosh aniqlanib, ularning har biri tuman rahbarlari va mas'ul tashkilotlarga biriktirildi. Amalga oshirilgan manzilli ishlar natijasida bugungi kunga qadar "og‘ir" toifadagi 128 nafar yoshning 126 nafari, ya'ni 98,4 foizining bandligi ta'minlandi.

Jumladan, 34 nafari doimiy ishga joylashtirildi, 5 nafariga imtiyozli kredit ajratildi, 39 nafarga ekin yer maydonlari berildi, 10 nafari mehnat migratsiyasiga yuborildi, 6 nafari muddatli harbiy xizmatga jalb etildi, 1 nafariga asbob-uskunalar ajratildi, 2 nafari oliy va professional ta'lim muassasalariga qamrab olindi, 2 nafari kasb-hunarga o‘qitildi hamda 27 nafari o‘zini o‘zi band qilgan holda mehnat faoliyatini boshladi.

Shuningdek, huquqbuzarlik va g‘ayriijtimoiy xatti-harakatlarga moyil yoshlar bilan ishlash bo‘yicha "Otaliqqa biriktirilgan yoshlar" tizimi doirasida ham samarali ishlar olib borilmoqda. Hozirda 68 nafar yosh 14 nafar mas'ul rahbarga biriktirilgan bo‘lib, ular bilan olib borilgan manzilli ishlar natijasida 27 nafari ish bilan ta'minlandi, 1 nafariga kredit ajratildi, 3 nafari tadbirkorlik, axborot texnologiyalari va xorijiy tillarga o‘qitildi. Turli ijtimoiy yordamlar natijasida 35 nafar yosh "og‘ir" toifadan chiqarildi.

Matbuot anjumanida harbiy xizmatdan qaytgan yoshlarning bandligini ta'minlash masalasiga ham alohida to‘xtalib o‘tildi. 2026-yil 1-may holatiga ko‘ra, harbiy xizmatni o‘tab qaytgan 68 nafar yoshdan 11 nafari shartnoma asosida xizmatni davom ettirmoqda, 28 nafarining rasmiy bandligi ta'minlangan. Shundan 24 nafari ishga joylashtirilgan, 1 nafariga tadbirkorlik krediti ajratilgan, 1 nafari o‘zini o‘zi band qilgan hamda 2 nafari kasb-hunarga o‘qitilgan.

Yoshlarni ijtimoiy qo‘llab-quvvatlash maqsadida "Yoshlar daftari" jamg‘armasi mablag‘lari hisobidan ham amaliy yordamlar ko‘rsatildi. 2026-yilning birinchi choragida 4 nafar yosh "Yoshlar daftari"ga kiritilib, ularga zarur ko‘maklar berildi. Jumladan, 4 nafar talabaning oliy ta'lim muassasasidagi kontrakt to‘lovlari uchun jami 23 million so‘m mablag‘ ajratildi.

Yoshlar tadbirkorligini rivojlantirish borasida ham qator loyihalar amalga oshirilmoqda. Xususan, Shodlik mahallasida yashovchi Yunusalieva Sevinch 100 million so‘m kredit mablag‘i hisobiga zamonaviy issiqxona tashkil etdi. Oilaviy tadbirkorlik dasturlari doirasida esa 85 nafar yoshga jami 187 million so‘m miqdorida moliyaviy ko‘mak ko‘rsatildi.

Bundan tashqari, Bo‘ston mahallasida yashovchi Cho‘lieva Mufazzalxon Nazirjon qizi hamda Jangirov Lochinbek Vazirlar Mahkamasining tegishli qarori asosida 130 million so‘mdan foizsiz ssuda olib, zamonaviy o‘quv markazlarini tashkil etish orqali yoshlarning sifatli ta'lim olishi va bandligini ta'minlashga munosib hissa qo‘shmoqda.

Matbuot anjumani yakunida Oqoltin tumanida yoshlar bilan ishlash, ularning bandligini ta'minlash, tadbirkorlik tashabbuslarini qo‘llab-quvvatlash va ijtimoiy himoyasini kuchaytirish bo‘yicha ishlar izchil davom ettirilishi ta'kidlandi.