Sirdaryo viloyati Oqoltin tuman hokimligi

2026-yil 27-aprel kuni Xalq deputatlari Oqoltin tumani Kengashining navbatdagi sessiyasi bo‘lib o‘tdi. Sessiyada tumanni ijtimoiy-iqtisodiy rivojlantirish, jamoat xavfsizligini mustahkamlash hamda aholi farovonligini oshirishga qaratilgan qator muhim masalalar ko‘rib chiqildi.

Kun tartibidagi birinchi masala yuzasidan tuman prokurori U.Qo‘shboqov hududdagi kriminogen vaziyat, jinoyatchilikning oldini olish va uning sabablarini bartaraf etish bo‘yicha amalga oshirilayotgan ishlar haqida axborot berdi. Ta’kidlanishicha, jinoyatlarning oldini olish borasida profilaktik tadbirlar kuchaytirilgan bo‘lib, bu borada hamkor tashkilotlar bilan tizimli ishlar olib borilmoqda.

Shundan so‘ng tuman Ichki ishlar bo‘limi boshlig‘i H.Bekmurodov 2026-yilning birinchi choragi davomida huquqbuzarliklar profilaktikasi va kriminogen vaziyat barqarorligini ta’minlash bo‘yicha hisobot taqdim etdi. Hisobotda jinoyatchilikni kamaytirish, fuqarolar xavfsizligini ta’minlash borasidagi aniq chora-tadbirlar muhokama qilindi.

Sessiyada shuningdek, O‘zbekiston Respublikasi Prezidenti rahbarligida o‘tkazilgan yig‘ilishda berilgan topshiriqlar ijrosi hamda 2025-yil uchun xususiylashtirish dasturining bajarilishi yuzasidan tuman hokimi o‘rinbosari M.Xomidjonov axborot berdi. Ushbu yo‘nalishda amalga oshirilayotgan ishlar tahlil qilinib, kelgusidagi vazifalar belgilab olindi.

Navbatdagi masalada tuman mahalliy budjetining 2026-yil boshiga shakllangan erkin qoldiq mablag‘larini taqsimlash masalasi ko‘rib chiqildi. Deputatlar mablag‘larni ijtimoiy soha va infratuzilma rivojiga yo‘naltirish yuzasidan takliflarni qo‘llab-quvvatladilar.

Sessiyada ijtimoiy himoya masalalariga ham alohida e’tibor qaratildi. Jumladan, ijtimoiy reyestrga kiritilgan, I-guruh nogironligi bo‘lgan va mehnatga layoqatli a’zosi mavjud bo‘lmagan oilalar xonadonlarini ta’mirlash orqali energiya samaradorligini oshirishga qaratilgan loyiha moliyalashtirilishi ma’qullandi.

Xotin-qizlarning jamiyatdagi o‘rnini mustahkamlash, ularning ta’lim olishi va tadbirkorlikka jalb etilishi, erta turmush va ajrimlarning oldini olish borasida amalga oshirilayotgan ishlar yuzasidan ham hisobot tinglandi. Mazkur yo‘nalishda olib borilayotgan ishlarni yanada kuchaytirish bo‘yicha tegishli topshiriqlar berildi.

Ekologiya sohasidagi masalalar ham kun tartibidan o‘rin oldi. Tumanda aholining ekologik madaniyatini yuksaltirish, atrof-muhitni muhofaza qilish hamda “Yashil makon” umummilliy loyihasi doirasida amalga oshirilayotgan ishlar samaradorligi tahlil qilindi.

Shuningdek, O‘zbekiston Respublikasi Prezidentining 2025-yil 21-apreldagi PF–71-son Farmoni ijrosi, deputat so‘rovlari ijrosi samaradorligi masalalari ham muhokama etildi.

Sessiya yakunida Oqoltin tumani hokimining 2026-yil 22-apreldagi qarorlari tasdiqlandi hamda kun tartibidagi barcha masalalar yuzasidan tegishli qarorlar qabul qilindi.