Sirdaryo viloyati Oqoltin tuman hokimligi

Mamlakatimizda pensiya tizimini modernizatsiya qilish, xizmatlarni aholiga yanada qulay va tezkor yetkazish maqsadida raqamlashtirish jarayonlari izchil davom ettirilmoqda. Shu jarayonlarning amaliy natijalarini keng jamoatchilikka yetkazish maqsadida Byudjetdan tashqari Pensiya jamg‘armasi Oqoltin tumani bo‘limi tomonidan navbatdagi press-tur tashkil etildi.

Tadbirda ommaviy axborot vositalari vakillari ishtirok etib, bo‘lim faoliyatida yo‘lga qo‘yilgan yangi elektron xizmatlar, ish jarayonlarining avtomatlashtirilishi va raqamlashtirishdan ko‘zlangan asosiy maqsadlar bilan yaqindan tanishdilar.

Press-tur doirasida jurnalistlarga pensiya va nafaqa tayinlash jarayonlarining to‘liq elektron platforma orqali amalga oshirilayotgani, arizalar qabul qilishdan tortib hujjatlarni ko‘rib chiqishgacha bo‘lgan bosqichlar inson omilisiz qayta ishlanishi haqida batafsil ma’lumot berildi. Bu esa, o‘z navbatida, murojaatlarni ko‘rib chiqish tezligini oshirib, xatoliklar ehtimolini minimumga tushirmoqda.

Shuningdek, fuqarolarning pensiya jamg‘armasi bo‘yicha ma’lumotlariga onlayn kirish imkoniyati, mobil ilovalar va yagona elektron portal orqali berilayotgan xizmatlar OAV vakillariga amaliy ko‘rinishda namoyish etildi. Mazkur tizimlar orqali pensiya hujjatlarini rasmiylashtirish ancha soddalashgani, navbatlar qisqargani va shaffoflik ta’minlangani ta’kidlandi.

Mutasaddilarning qayd etishicha, tizimni raqamlashtirish nafaqat aholiga xizmat ko‘rsatish sifatini yaxshilamoqda, balki jamg‘arma ichki jarayonlarini ham optimallashtirib, resurslardan samarali foydalanishga xizmat qilmoqda. Ayniqsa, ma’lumotlar bazalarining integratsiyalashuvi fuqarolarning turli idoralarga borib-kelish zaruratini kamaytirib, barcha jarayonlarni bir nuqtada hal qilish imkonini yaratmoqda.

Press-tur yakunida jurnalistlar o‘zlarini qiziqtirgan savollar bilan murojaat qilib, mutaxassislar tomonidan batafsil javoblar oldilar.