Korrupsiyaga qarshi kurash — adolat, ishonch va jamiyat taraqqiyotining muhim sharti
2026-10-29 12:40:00 / Yangiliklar

Bugun Oqdaryo tuman hokimligida tuman Oila va xotin-qizlar bo‘limi xodimlari hamda mahallalardagi xotin-qizlar faollari ishtirokida “Korrupsiyaga qarshi kurash — adolat, ishonch va jamiyat taraqqiyotining muhim sharti” mavzusida seminar o‘tkazildi.
Seminarda Oila va xotin-qizlar qo‘mitasining komplayens bo‘yicha bosh mutaxassisi Sherzod Berdiev ishtirok etib, korrupsiyaning salbiy oqibatlari, xotin-qizlar bilan ishlash tizimida halollik va shaffoflikning o‘rni, manfaatlar to‘qnashuviga yo‘l qo‘ymaslik masalalari yuzasidan tushunchalar berdi.
Shuningdek, o‘z xizmat vazifalarini bajarishda qonuniylik va xolislik tamoyillariga amal qilish, korrupsiyaviy holatlarga murosasiz munosabatda bo‘lish hamda aholi bilan ishlashda ochiqlikni ta’minlashning ahamiyati ta’kidlandi.
Seminardan ko‘zlangan asosiy maqsad — xodimlarning korrupsiyaga qarshi kurashish borasidagi bilim va ko‘nikmalarini oshirish, faoliyatda halollik, mas’uliyat va shaffoflik tamoyillarini mustahkamlashdan iborat.
📌 Korrupsiyaga qarshi kurashish — har bir xodimning mas’uliyati va jamiyat oldidagi burchidir.






