Surxondaryo viloyati Oltinsoy tumani hokimligi

“Har birimiz 10 donadan mevali va manzarali daraxt ko‘chatlari ekish ishlarini tashkil etishga munosib hissa qo‘shaylik!” OLTINSOY TUMANI KENGAShI DEPUTATLARINING TUMAN AHOLISIGA MUROJAATI Assalomu-alaykum aziz hamyurtlar! Qadrli oltinsoyliklar! Ma’lumki, muhtaram Prezidentimiz Sh.M.Mirziyoyevning 2019-yil 30-aprel va 1-may kunlari Surxondaryo viloyatiga tashrifi davomida berilgan topshiriqlari bo‘yicha vohamizda katta bunyodkorlik ishlari amalga oshirilmoqda. Shunday ulkan loyihalardan biri bo‘lgan 4 R-100 “Manguzar q.-Jarqo‘rg‘on sh.-Bandixon q.-Oltinsoy q.-Denov sh.” Avtomobil yo‘lining rekonstruksiya ishlari jadallik bilan olib borilmoqda. Shu jumladan, Oltinsoy tumani hududidan o‘tuvchi davlat ahamiyatidagi 4R–100 yo‘lining 137–162 km. qismlarida yo‘l qurilishi va rekonstruksiya ishlari boshlab yuborildi. Mazkur loyiha Prezidentimizning tashabbusi bilan Osiyo taraqqiyot banki mablag‘lari hisobidan amalga oshirilayotgan bo‘lib, kelgusida tumanimizning yo‘l-transport infratuzilmasi tubdan yaxshilanadi hamda tumanimiz iqtisodiy salohiyati ham oshib, mintaqaviy aloqalarni yaxshilash va aholining turmush darajasini oshirishi shubhasiz. Oltinsoy tumani orqali o‘tuvchi 4R–100 yo‘lining 137–162 km. oralig‘idagi qayta qurish va rekonstruksiya ishlari tugatilishi orqali mintaqaning ijtimoiy-iqtisodiy hayotida muhim siljishlar kutilmoqda. 1. Yo‘l qurilishi va rekonstruksiya ishlarining ahamiyati: - Jami 25 km uzunlikdagi yo‘lning zamonaviy standartlar asosida yangilanishi; - Qo‘shimcha yo‘laklar, chorrahalar, yo‘l belgilari va yoritish tizimlarining tashkil etilishi; - Xavfsizlikni ta’minlovchi piyodalar o‘tish yo‘llari va avtobus bekatlarining qurilishi. 2. Ijtimoiy infratuzilmaning rivojlanishi: Yo‘l qurilishi tugashi bilan yo‘l yoqasida quyidagi ijtimoiy ob’ektlar tashkil etish rejalashtirilmoqda: - Avtoxizmat markazlari (STOlar, avtomoykalar); - Oilaviy savdo do‘konlari, bozorchalar; - Qahvaxona, oshxona va dam olish maskanlari; - Mehmonxonalar va yo‘lboshchilar uchun xizmat maskanlari; - Tez tibbiy yordam punktlari va politsiya nazorati punktlari. 3. Yaratiladigan ish o‘rinlari: Qurilish yakunlangandan so‘ng, yangidan barpo etiladigan obektlar orqali bevosita va bilvosita ish o‘rinlari yaratilishi kutilmoqda: - 500 ga yaqin doimiy ish o‘rinlari, jumladan: - 150 nafar savdo va xizmat ko‘rsatish sohasida, - 100 nafar oziq-ovqat ishlab chiqarish va realizatsiya qilish sohasida, - 50 nafar yo‘l-transport xizmati sohasida (avtoservis, yo‘l xizmati), - 100 nafar qurilishdan so‘nggi ekspluatatsiya ishchilaridan iborat, - Qolgan 100 nafar turli yo‘nalishdagi yordamchi va ma’muriy xizmatlarda. 4. Bandlikni oshirish va mahalliy aholining daromad manbalari: - Mahalliy yoshlar va ishsizlar uchun maxsus kasbga o‘qitish kurslari tashkil etiladi; - Ayollar va yoshlar uchun kichik biznes va oilaviy tadbirkorlikka shart-sharoitlar yaratiladi; - Savdo va xizmat ko‘rsatish ob’ektlari orqali mahalliy mahsulotlarning bozorga chiqishi osonlashadi. 5. Umumiy ijtimoiy-iqtisodiy samaralar: - Oltinsoy tumanida transport oqimi yaxshilanadi va logistika tizimi rivojlanadi. Turizm salohiyatini oshirishga hissa qo‘shadi (agroturizm, tarixiy maskanlar), Yangidan ishga tushiriladigan biznes-loyihalar orqali soliq tushumlari ko‘payishi ta’minlanadi, hamda mintaqada aholining yashash darajasi va turmush sifati oshadi. 6. Ko‘kalamzorlashtirish ishlarining ko‘lami: - Yo‘l qurilishi bilan bir vaqtda 10000 mingdan ortiq daraxt ko‘chatlari ekilmoqda. Kelgusida yo‘l yoqalari bo‘ylab 100000 mingga yaqin gul ko‘chatlari ekish rejalashtirilgan. Ekilgan ko‘chatlar va gullarga muntazam parvarish ko‘rsatish uchun maxsus texnikalar va sug‘orish tizimlari joriy etilmoqda. 7. Ekologik va estetik ahamiyati: - Daraxt va gullar havo tozaligini ta’minlab, atrof-muhit sifatini yaxshilaydi; - Yo‘l atrofining estetik ko‘rinishi yanada yaxshilanadi va bu haydovchilar va yo‘lovchilar uchun qulay muhit yaratadi; - Gullar va yashilliklar hududdagi harorat balansligini ta’minlashda muhim rol o‘ynaydi. 8. Aholining faol ishtiroki:- Ko‘kalamzorlashtirish ishlariga aholining jalb etilishi uchun muloqotlar, uchrashuvlar, aksiyalar o‘tkazilmoqda; - Mahalla, maktablar va NNTlar hamkorligida gul ekish tadbirlari tashkil etilmoqda; - Yoshlar, ayollar va talabalarning bu jarayondagi faol ishtiroki jamoaviy mas’uliyatni oshirmoqda. 9. Kelgusidagi ijobiy natijalar: - Yo‘l bo‘ylab yaratiladigan yashil hududlar — tumanning ekologik pasportini yaxshilaydi; Turizm va transport logistikasi rivojiga hissa qo‘shadi; - Mahalliy aholida tabiatga e’tibor va mas’uliyatni oshirishga xizmat qiladi; - Yashil hududlar yaratilishi — kelajak avlod uchun sog‘lom muhitni kafolatlaydi. Oltinsoy tumanida yo‘l qurilishi bilan birga amalga oshirilayotgan ko‘kalamzorlashtirish va gul ekish ishlari nafaqat hududni obodonlashtiradi, balki ekologik barqarorlikka, aholining ongida tabiatga mehr va mas’uliyat tuyg‘usini mustahkamlashga xizmat qiladi. Bu sa’y-harakatlar orqali tumanning kelajakda go‘zal va ekologik toza hududga aylanishi kutilmoqda. Aziz hamyurtlar! Hozirgi kunda mazkur yo‘l qurilishi jarayonida yo‘l yoqasidagi mevali va manzarali daraxtlarni ko‘chirib o‘tqazish hamda yangi ko‘chatlar ekish ishlari jadal olib borilmoqda. Ushbu tadbirlarni amalga oshirishda tumanimizning keng jamoatchilik vakillari, yoshlar, nuroniylar, mahalla faollari, korxonalar, tashkilotlar ishchi-xizmatchilari va aholining ko‘magiga jiddiy ehtiyoj sezilmoqda. Barcha oltinsoyliklar bir jon, bir tan bo‘lib, yangi qurilayotgan zamonaviy avtomobil yo‘limizning atrofiga milliy qadriyatlarimizdan biri hashar usulida mevali va manzarali daraxt ko‘chatlari ekib, har birimiz shunday ulug‘vor yo‘l qurilishiga o‘z hissamizni qo‘shaylik. Qadrli do‘stlar! Bu keng qamrovli yangi katta yo‘l atroflariga daraxt ko‘chatlari ekish loyihasi yaqinda bo‘lib o‘tgan Xalq deputatlari tuman Kengashining 7-chaqiriq 8-sessiyasida ko‘rib chiqildi va tumandagi tashkilot va korxonalar, xonadonlar va barcha fuqarolarni bu xayrli yumushdagi ishtirokini ta’minlash deputatlar tomonidan taklif qilindi. Tuman hududidagi tabiiy muhit va yashil hududlarni saqlab qolishga qat’iy amal qilish, mahalla, maktab va davlat tashkilotlarini hududlarda yashil maydonlar yaratish, ko‘chat ekish, parvarishlash ishlariga faol jalb etish, tumandagi barcha fuqarolarni ham ekologik barqarorlikka hissa qo‘shishga da’vat etib, “Har birimiz 10 donadan mevali va manzarali daraxt ko‘chatlari ekish ishlarini tashkil etishga munosib hissa qo‘shaylik!”, “Har bir oiladan kamida 10 ta daraxt” kabi ezgu tashabbuslarni qo‘llab-quvvatlash orqali ko‘chat ekishni ommalashtirish borasida Kengash qarori qabul qilindi. Biz — Xalq deputatlari Oltinsoy tuman Kengashi deputatlari Siz aziz saylovchilarimizdan, mahallalar aholisidan ana shu umumxalq hashariga qo‘shilib, tumanimiz chiroyiga chiroy, salomatligimiz uchun foydali bo‘lgan, Oltinsoyning ko‘rkiga ko‘rk qo‘shadigan yashil bog‘lar yaratishga astoydil ko‘mak berishingizni so‘raymiz. Hurmatli nuroniy otaxon va onaxonlar! Sizlar har ishda fidoyi, jonkuyar, ko‘pni ko‘rgan insonlar sifatida yoshlardan obodlik, poklik, mehnat tarbiyasi borasida qimmatli maslahat va o‘gitlaringizni darig‘ tutmang. Yangi nihollarni parvarishlash madaniyatini yuksaltirish kabi ezgu ishlarni keng targ‘ib eting, bu boradagi boy tajribangizdan yoshlarni xabardor qiling. Qadrli qalbi qaynoq, serg‘ayrat yoshlarimiz! Biz sizlarni ham “Yashil makon” umummilliy loyihasi bo‘yicha tashabbuskor bo‘lishga, tengdoshlaringizni yashillikni ko‘paytirishga chorlashga, yo‘l bo‘ylarini obod qilishda tashabbus ko‘rsatishga chaqiramiz. Hurmatli fermer xo‘jaliklari rahbarlari, mahalla fuqarolar yig‘inlari faollari, korxona, tashkilot va muassasa ishchi xodimlari hamda tumanimizning barcha fuqarolari! Hammamiz qo‘lni qo‘lga berib, tumanimizni yanada obod etishga hissa qo‘shaylik. Muhtaram Prezidentimiz tashabbusi bilan yurtimizda asos solingan “Yashil makon” umummilliy loyihasi atrofida yanada jips bo‘lib birlashaylik.Prezidentimiz g‘amxo‘rligi asosida bunyod etilayotgan yangi zamonaviy avtomobil yo‘li atrofini yam-yashil dov-daraxtlar bilan bezab, biz ana shunday g‘amxo‘rlikka munosib, ahil va hamjihat yurt odamlari ekanligimizni namoyon etaylik. Aziz do‘stlar! Oltinsoy tumanida yo‘l qurilishi bilan birga amalga oshirilayotgan ko‘kalamzorlashtirish va gul ekish ishlari nafaqat hududni obodonlashtiradi, balki ekologik barqarorlikka, aholining ongida tabiatga mehr va mas’uliyat tuyg‘usini mustahkamlashga xizmat qiladi. Bu sa’y-harakatlar orqali tumanimiz kelajakda go‘zal va ekologik toza hududga aylanadi.