Belarus delegatsiyasi Oltiariqdagi uzumchilik xo‘jaligi faoliyati bilan tanishdi
2026-09-23 11:00:00 / Yangiliklar
Belarus Respublikasi Minsk viloyati ijroiya qo‘mitasi raisi A.Kusharenko boshchiligidagi delegatsiya a’zolari Oltiariq tumanidagi «Xayrullo Baxrom Boymatov» fermer xo‘jaligida bo‘ldi.
Tashrif davomida mehmonlarga Farg‘ona viloyati hokimining o‘rinbosari X.Axmedov hamda Oltiariq tumani hokimining o‘rinbosari A.Ruzmatov hamrohlik qildi.
Farg‘ona va Minsk viloyatlari o‘rtasidagi hamkorlik kelishuvlarini amalga oshirish maqsadida tashkil etilgan tashrif doirasida delegatsiya vakillari fermer xo‘jaligida uzumchilik yo‘nalishida amalga oshirilayotgan ishlar bilan yaqindan tanishdilar.
Xo‘jalik rahbari I.Boymatov mehmonlarga Oltiariqda uzum yetishtirish, uni parvarishlash va hosilni saqlash jarayonlari, yetishtirilayotgan uzum navlari hamda mahsulotlarni eksport qilish yo‘nalishlari haqida ma’lumot berdi.
Xorijiy hamkorlar Oltiariqda yetishtirilayotgan uzum navlari, ularni parvarishlashning zamonaviy usullari, mahsulotni saqlash texnologiyalari va eksport geografiyasiga alohida qiziqish bildirdilar.
