Olmaliqda yangi o‘quv yili boshlandi
2026-09-02 08:50:00 / Yangiliklar
Olmaliq shahrida 2026/2027-o‘quv yili “Bilimlar bayrami" bilan ko‘tarinki ruhda boshlandi. Hududdagi barcha umumta’lim maktablarida tashkil etilgan tantanali tadbirlarda o‘quvchilar, ustoz va murabbiylar, ota-onalar hamda jamoatchilik vakillari ishtirok etdi.
Olmaliq shahri hokimi Barhayot Meliyev 20-sonli umumta’lim maktabida bo‘lib, “Bilimlar bayrami” tantanasida ishtirok etdi. Shahar hokimi O‘zbekiston Respublikasi Prezidentining mamlakatimiz maktablari o‘quvchilari, ustoz va murabbiylariga yo‘llagan tabrigini o‘qib eshittirdi. Shuningdek, o‘quvchilar, ota-onalar va pedagoglarni yangi o‘quv yili bilan tabriklab, yosh avlodga sifatli ta’lim va munosib tarbiya berish, ularning zamonaviy bilim va kasb-hunarlarni egallashi uchun yaratilayotgan imkoniyatlar xususida to‘xtaldi.
Birinchi sinf o‘quvchilarining quvonchi, ustozlarning ezgu tilaklari tadbirga o‘zgacha fayz bag‘ishladi. Tantanalar an’anaviy birinchi qo‘ng‘iroq sadosi bilan yakunlanib, yangi o‘quv yiliga start berildi. Jaranglagan qo‘ng‘iroq sadosi barcha o‘quvchilarni yangi bilimlar, yangi izlanishlar va yangi zafarlar sari chorladi.