Aziz hamshaharlar! Muhtaram faxriylar, qadrli yoshlar!
Munis opa-singillar!
Siz azizlarni, ko‘pmillatli butun shahrimiz ahlini  qadimiy va hamisha navqiron bayram – Navro‘zi olam bilan chin yurakdan samimiy muborakbod etaman. Bugun fasllar almashib, yeru ko‘kda ilohiy moʻjizalar yuz bermoqda. Yangi kun, yangi mavsum, yangi hayot nafasi boshlanmoqda. Tabiat uyg‘onishi bilan zimiston kechalardan zerikkan ko‘ngillar yasharib-yayramoqda. Shunday shukuhli va ulug‘ kunlar barchamizga muborak bo‘lsin!
Qadrli do‘stlar!
Ma’lumki, xalqimiz qadimda Navro‘zni “yil boshi” deb atagan. Biz ham ajdodlarimiz kabi shu ajoyib kunda yaxshi niyatlar qilamiz. Navro‘zning betakror go‘zalligi, insonparvarlik ruhi va teran falsafasi globallashuv davrida ham butun bashariyatni hayratga solayotgani uning azaliy mohiyati va hayotbaxsh kuchidan dalolat beradi. Navro‘zi olam falsafasi bizning orzu-intilishlarimiz, amaliy ishlarimiz bilan uzviy bog‘lanib ketganini bugun har qadamda yaqqol ko‘rish mumkin. Bu yilgi bayram tantanalari “Navro‘zni ulug‘lash – insonni ulug‘lashdir!” degan ezgu g‘oya atrofida butun xalqimizni birlashtirmoqda.
Inson qadrini ulug‘lash, uning hayotiy manfaatlari va ijtimoiy himoyasini ta’minlash, ehtiyojmand aholi qatlamlarini qo‘llab-quvvatlash, millati, tili va dinidan qat’i nazar, har bir yurtdoshimizga mehr va e’tibor ko‘rsatish faoliyatimiz mezoniga aylanmoqda. Mamlakatimizdagi do‘stlik va hamjihatlik muhiti, yaxshi qo‘shnichilik, tinchliksevar tashqi siyosat tufayli xalqaro maydonda O‘zbekistonimizning obro‘-e’tibori yuksalmoqda. Navro‘zi olamning insonparvarlik, tinchlik va bag‘rikenglik kabi qadriyatlariga uyg‘un va hamohang bunday ishlarimizni biz kelgusida yanada kengaytiramiz.
Hayotga katta orzu-umidlar bilan kirib kelayotgan yoshlarimiz Yangi O‘zbekistonning ilg‘or va qudratli kuchiga aylanib borayotganiga barchamiz guvohmiz. Azmu shijoatli, iste’dodli farzandlarimizning dadil va mardona harakatlari butun dunyoda katta aks-sado berayotgani bizni benihoya quvontiradi. Bugun shahrimizdagi yuqori texnologik korxonalarni boshqarayotganlar – asosan bilimli va malakali yoshlarimizdir. Tadbirkorlik rivojiga yangi kuch va shiddat berayotgan ham aql-idrokli, serg‘ayrat va ishbilarmon o‘g‘il-qizlarimizdir. Sarhadlarimizda doimo sergak turgan askar va ofiserlar ham mard va jasur o‘g‘lonlarimizdir. O‘z davrida jahonni lol qoldirgan buyuk ajdodlarimizning munosib davomchilari bo‘lgan bunday yoshlarimiz bilan xalqimiz, Vatanimiz haqli ravishda faxrlanadi.
Aziz va muhtaram vatandoshlar!
Bu yilgi Navro‘z muqaddas Ramazon oyida, uning tabarruk fazilatlariga uyg‘un holda o‘tayotgani bayramga alohida ruh, o‘zgacha fayz va quvonch bag‘ishlamoqda.
Avvalo, muqaddas dinimiz buyurgan ibodat va amallarni muborak Ramazon oyida chin dildan, ixlos bilan ado etib, bugun hayit ayyomini katta shodu xurramlik bilan kutib olayotgan siz azizlarni, yurtimizdagi jamiki mo‘min-musulmonlar, butun xalqimizni samimiy tabriklab, barchangizga o‘zimning yuksak ehtiromim va eng ezgu tilaklarimni izhor etaman.
Hurmatli hamshaharlar!
Mana shu bahoriy lahzalarda barchamiz ulug‘ ajdodlarimizning tilaklariga qo‘shilib, ilohim, har kunimiz Navro‘zdek go‘zal, Navro‘zdek fayzli va mazmunli bo‘lsin, deb niyat qilamiz.
Ushbu unutilmas, dilbar lahzalarda siz, azizlarni, barcha-barcha yurtdoshlarimizni Navro‘z bayrami bilan yana bir bor qutlayman. Har bir xonadonga, butun yurtimizga tinchlik, baxtu saodat va fayzu baraka tilayman!
Qadriyatlaring boqiy bo‘lsin, Navro‘z!
Navro‘zi olam muborak bo‘lsin!