Toshkent viloyati Ohangaron shahar hokimligi

Hurmatli Ohangaron shahri aholisi!

Shahrimizning tinchligi, osoyishtaligi hamda mol-mulkingizning daxlsizligini ta’minlash Ohangaron shahar ichki ishlar bo‘limining eng ustuvor vazifalaridan biridir.

So‘nggi vaqtlarda ayrim ko‘p qavatli uylarning yo‘laklari va kirish qismlarida nazoratsiz qoldirilgan velosipedlar, bolalar aravachalari, elektr samokatlar hamda boshqa qimmatbaho buyumlarni o‘g‘irlash holatlari, shuningdek, xonadonlar va savdo do‘konlariga qaratilgan o‘g‘irlik jinoyatlari qayd etilmoqda.

Aziz shahardoshlar!

Jinoyatning oldini olish uni ochishdan ko‘ra samarali va muhimdir. Shu bois har bir fuqaroning ogohligi va mas’uliyatli munosabati shahrimiz xavfsizligini ta’minlashda muhim ahamiyat kasb etadi.

Shu munosabat bilan sizlardan quyidagi xavfsizlik choralariga qat’iy amal qilishingizni so‘raymiz:

- Ko‘p qavatli uylarning yo‘laklari va kirish qismlarida velosiped, bolalar aravachalari hamda boshqa qimmatbaho buyumlarni nazoratsiz qoldirmang.
- Uydan chiqishda eshik va derazalarning mahkam yopilganligini tekshiring.
- Uzoq muddatga safarga chiqishdan oldin ishonchli qo‘shnilaringizni xabardor qiling va imkoniyat bo‘lsa, xonadonga videokuzatuv hamda signalizatsiya vositalarini o‘rnating.
- Savdo do‘konlari, omborxonalar va boshqa tadbirkorlik obyektlarini ishonchli qulflash, videokuzatuv vositalari bilan jihozlash hamda kunlik tushum mablag‘larini do‘konda qoldirmaslikka alohida e’tibor qarating.

Eng muhimi, xonadonlaringiz, savdo do‘konlaringiz va boshqa mulk obyektlaringizni Ichki ishlar organlari huzuridagi Qo‘riqlash xizmatiga qo‘riqlovga topshirishingizni tavsiya etamiz. Qo‘riqlash xizmatiga ulangan obyektlar zamonaviy texnik qo‘riqlov vositalari orqali doimiy nazorat qilinadi, xavf tug‘ilganda esa tezkor harakatlanuvchi guruhlar qisqa vaqt ichida voqea joyiga yetib borib, qonuniy choralar ko‘radi. Bu esa mol-mulkingizni ishonchli himoya qilishning eng samarali usullaridan biri hisoblanadi.

Agar mahallangizda, ko‘cha yoki uyingiz atrofida shubhali shaxslar yoki g‘ayrioddiy holatlarga duch kelsangiz, befarq bo‘lmang va zudlik bilan ichki ishlar organlariga xabar bering. Fuqarolarning tezkor xabardorligi ko‘plab jinoyatlarning oldini olish va ularni "issiq izidan" fosh etish imkonini bermoqda.

Qadrli Ohangaron ahli!

Tinch va xavfsiz shaharni barpo etish – barchamizning umumiy vazifamizdir. Har bir xonadon, har bir tadbirkorlik obyekti va har bir fuqaroning hushyorligi jinoyatchilikka qarshi kurashishda muhim o‘rin tutadi. Unutmang, ehtiyotkorlik va xavfsizlik choralariga rioya qilish hamda mulkingizni Qo‘riqlash xizmatiga ishonchli qo‘riqlovga topshirish – oilaviy xotirjamlik va mol-mulkingiz xavfsizligining eng mustahkam kafolatidir.

Hurmat bilan,
Ohangaron shahar ichki ishlar bo‘limi boshlig‘i
Saidxon Kamilxanov