Ohangaron shahar hokimi Sadriddin Shoqosimovning 30-iyun – Yoshlar kuni munosabati bilan tabrigi
2026-06-30 09:25:00 / Rahbariyatning bayonotlari va nutqlari
Assalomu alaykum, aziz yoshlar, muhtaram ustozlar va qadrli shahar ahli!
Barchangizni yurtimiz hayotidagi qutlug‘ bayram – 30-iyun – Yoshlar kuni bilan chin qalbimdan samimiy muborakbod etaman.
Qadrli o‘g‘il-qizlarim!
Siz, azizlarni bugungi yoshlik, baxt va nafosat ayyomi bilan yana bir bor tabriklab, barchangizga sihat-salomatlik, ulkan yutuq va omadlar tilayman. Hech qachon unutmang, g‘alaba va baxt – astoydil intilganniki!
Aziz yoshlar!
Bugungi Yangi O‘zbekiston taraqqiyotining eng ishonchli tayanchi, ertangi kunimizning hal qiluvchi kuchi aynan sizlarsiz. Mamlakatimizda yoshlarga oid davlat siyosati ustuvor yo‘nalish sifatida belgilangani, har bir sohada sizlarning bilim olishingiz, kasb-hunar egallashingiz, o‘z iqtidoringizni namoyon etishingiz va munosib hayot kechirishingiz uchun keng imkoniyatlar yaratilayotgani buning yaqqol isbotidir.
Bugun davlatimiz rahbarining tashabbusi bilan yoshlarni qo‘llab-quvvatlash mutlaqo yangi bosqichga ko‘tarildi. Zamonaviy maktablar va oliy ta’lim muassasalari barpo etilmoqda, xalqaro ta’lim dasturlari kengaymoqda. "Yoshlar daftari", "Yoshlar balansi", "Yoshlar tadbirkorligini rivojlantirish" dasturlari orqali minglab yigit-qizlarning tashabbuslari ro‘yobga chiqmoqda.
Qadrli Ohangaron shahar yoshlari!
Sizlar ham ilm-fan, sport, madaniyat, tadbirkorlik va jamoat ishlarida faol ishtirok etib, yuksak natijalarga erishmoqdasiz. Sizlarning har bir yutug‘ingiz nafaqat oilangiz, balki butun shahrimiz uchun ham faxr manbaidir. Sizlardan yurtimiz kelajagi uchun mas’uliyatni his qilgan holda, bilim olishdan to‘xtamaslikni, yuksak maqsadlar sari intilishni va Vatanimiz taraqqiyotiga munosib hissa qo‘shishni kutib qolamiz.
Ushbu bayramni sizlar bilan birgalikda katta shodu xurramlik bilan o‘tkazayotgan ota-onalaringizni, ustoz-murabbiylaringizni hamda yosh avlodni tarbiyalash va qo‘llab-quvvatlash yo‘lida mehnat qilib kelayotgan barcha fidoyi insonlarni samimiy qutlab, ularga o‘zimning yuksak hurmat-ehtiromim va minnatdorchiligimni bildiraman.
Aziz yoshlar!
Ishonchim komilki, sizlar o‘z bilimingiz, g‘ayratingiz va tashabbuslaringiz bilan Yangi O‘zbekiston taraqqiyotiga munosib hissa qo‘shasizlar.
Yoshlarimiz bor ekan – Yangi O‘zbekistonning kelajagi yanada porloq bo‘ladi!
Yurtimiz tinch, osmonimiz musaffo, yoshlarimizning orzu-intilishlari hamisha yuksak bo‘lsin!
Bayramingiz muborak bo‘lsin!