Bugun Ohangaron shahrida shahar hokimi Sadriddin Shoqosimov tomonidan "Hokimlik soati" yig'ilishi bo'lib o'tdi
2026-06-08 10:00:00 / Yangiliklar
Bugun shahar hokimi Sadriddin Shoqosimov raisligida navbatdagi “Hokimlik soati” yigʻilishi boʻlib oʻtdi. Keskin tanqidiy va tahliliy ruhda oʻtgan ushbu yigʻilishda shahardagi barcha korxona, tashkilot va boʻlim rahbarlari, hokimlik apparati xodimlari hamda shahar Kengashi deputatlari ishtirok etishdi.
Yigʻilish kun tartibidan mahalliy budjet daromadlarini taʼminlash, qurilish kompleksi va investitsiya loyihalari ijrosi hamda aholi murojaatlari bilan ishlash tizimidagi kamchiliklar oʻrin oldi.
Yigʻilishda shahardagi yirik ijtimoiy soha va infratuzilma obyektlaridagi qurilish-tizimlash ishlarining borishi tahlil qilindi. Bu borada shahar rahbari tomonidan quyidagi topshiriqlar belgilandi:
- 3-sonli umumtaʼlim maktabi Investitsiya dasturi doirasida rekonstruksiya qilinayotgan mazkur taʼlim muassasasida qurilish va pardozlash ishlarini yanada jadallashtirish boʻyicha masʼullarga qatʼiy koʻrsatma berildi;
- Madaniyat va Yoshlar markazlari qurilish-montaj ishlari deyarli yakunlangan ushbu ikki yirik maʼrifat maskanini joriy hafta yakuniga qadar foydalanishga topshirish va ochilish marosimlariga yuqori darajada tayyorgarlik koʻrish vazifasi yuklatildi;
- Situatsion monitoring markazi shahar hokimi tomonidan joriy haftadan boshlab ushbu markaz faoliyatini toʻliq yoʻlga qoʻyish hamda uning ishga tushirilishini taʼminlash boʻyicha aniq muddatli topshiriq berildi.
Yigʻilishning eng tanqidiy qismi aholidan kelib tushayotgan murojaatlar tahliliga bagʻishlandi. Ayrim mahallalarda fuqarolar muammolarining ortib borayotgani, mahalla xodimlari (raislari va masʼullari) joylarda aholi bilan toʻgʻridan-toʻgʻri, tizimli ishlamayotgani qattiq qoralandi.
Sustkashlikka yoʻl qoʻygan mutasaddilar ogohlantirilib, shahardagi har bir korxona, tashkilot va muassasada aholi murojaatlari bilan ishlashni tubdan oʻzgartirish, har bir masalani joyiga chiqqan holda, qonuniy va tizimli hal etish mexanizmini yoʻlga qoʻyish yuzasidan qatʼiy talablar qoʻyildi.
Yigʻilish yakunida kun tartibidagi barcha masalalar yuzasidan chora-tadbirlar belgilanib, masʼullarning shaxsiy javobgarligi koʻrsatib oʻtildi.