Toshkent viloyati Ohangaron shahar hokimligi

 Bugun shahar hokimi Sadriddin Shoqosimov raisligida yarim yillik mahalliy budjet soliq tushumlarini ta’minlash hamda mahallalarda ijtimoiy-iqtisodiy muhitni yaxshilashda “mahalla yettiligi”ning o‘rni va mas’uliyatiga bag‘ishlangan kengaytirilgan tanqidiy-tahliliy yig‘ilish bo‘lib o‘tdi.

Yig‘ilishda dastlabki 6 oylik yakunlari bo‘yicha mahalliy budjet prognoz ko‘rsatkichlarining ijrosi, soliq tushumlarini undirishda aholini keng jalb qilish hamda rejalarni muddatidan kechiktirmay bajarish masalalari atroflicha muhokama qilindi.
 

Shahar rahbari budjet tushumlarini ta’minlash faqatgina soliq idoralarining vazifasi emas, balki bevosita joylarda “mahalla yettiligi”ning birdamlikdagi ishiga bog‘liq ekanini qat’iy uqtirdi. Mahallalarda soliqlar va majburiy to‘lovlarni o‘z vaqtida to‘lash madaniyatini oshirish, bu borada aholi va tadbirkorlar o‘rtasida tizimli targ‘ibot ishlarini yo‘lga qo‘yish bo‘yicha aniq vazifalar belgilandi. Yettilik a’zolari birgalikda, xonadonbay yurgan holda, tushuntirish va jalb qilish ishlarini kuchaytirishi lozimligi ko‘rsatib o‘tildi.

Shuningdek, mahallalarda fuqarolar murojaatlari bilan ishlash, hududlarni obod va ozoda saqlash, mavjud infratuzilmalarga e’tibor qaratish, daraxt va ko‘chatlarni asrab-avaylash, aholi muammolarini joyida hal etish hamda xonadonbay ishlash tizimini kuchaytirish zarurligi alohida ta’kidlandi.

Mahallaga kelayotgan har bir murojaatni chuqur o‘rganish, muammolarni yuqori idoralarga chiqarmasdan, mahalla darajasida hal etish tizimi yetarli darajada yo‘lga qo‘yilmagan.

Shahar hokimi Sadriddin Shoqosimov faoliyatida sustkashlikka yo‘l qo‘ygan mas’ullarni jiddiy ogohlantirib, ish uslubini butunlay o‘zgartirish talabini qo‘ydi.

“Mahalla yettiligi — xalq bilan davlat o‘rtasidagi eng asosiy ko‘prikdir. Agar yettilik o‘zaro birlashib, aholining ichiga kirmasa, hududdagi tozalikdan tortib budjet tushumlarigacha bo‘lgan ishlarda natija bo‘lmaydi. Har bir rahbar o‘z hududi uchun shaxsan javobgandir”, — dedi shahar rahbari.

Yig‘ilish yakunida barcha mahalla yettiliklariga topshiriqlarni to‘g‘ri va tizimli tashkil etish, fuqarolar bilan ishlash samarasini oshirish hamda yarim yillik yakunlari bo‘yicha kamchiliklarni qisqa muddatda bartaraf etish yuzasidan qat’iy choralar belgilandi.