Toshkent viloyati Ohangaron tumani hokimligi

Odatda fermer, dehqon, umuman qishloq xo‘jaligi sohasiga oid shaxs deganda ko‘z oldimizga uzun bo‘yli, baquvvat, oyog‘ida rezina etik, boshida shlyapa, beliga oq belbog‘ bog‘lab olgan er yigit gavdalanadi. Biz ham bugungi maqolamiz orqali bir necha o‘n yildan buyon g‘allakorlar orasida peshqadamlik qilib kelayotgan, piyoz, kartoshka, dukkakli o‘simliklarni yetishtirib, eksport qilayotgan tumanimizning ilg‘or fermerlaridan biri haqida hikoya qilmoqchimiz.

Faqat ushbu ilg‘or fermerimizga yuqoridagi ta’riflarni qo‘llash biroz noo‘rin bo‘ladi. Sababi bugungi kunda tumanimizda ayollar ham qishloq xo‘jaligi sohada tengma-teng faoliyat yuritmoqda. Ular orasida Dono Qorayeva kabi ilg‘or va zamonaviy yondashuvga ega fermerlarning borligi quvonarli.

Dono Qorayeva – Ohangaron tumanidagi ilg‘or fermerlardan biri. U 10 yildan ziyod vaqt davomida g‘alla, piyoz, kartoshka, dukkakli o‘simliklar, poliz ekinlarini yetishtirish bilan shug‘ullanib kelmoqda.

Dono Qorayeva 1991-yil Ohangaron shahrining Bo‘ston mahallasida tavallud topgan. Yoshligidan yerga mehr qo‘yib katta bo‘lgan qahramonimiz 2016-yilda o‘zining fermerlik faoliyatini boshlaydi. Fermerlik sir-asrorlarini ota-onasidan o‘rgangan qahramonimiz bugungi kunga kelib, ushbu sohada yetuk mutaxassisga aylangan.

– Fermerlik sohasiga qiziqish, ota-onamdan o‘tgan. Onam Ra’no opa Qorayeva ham zamin bilan tillashgan mohir fermer bo‘lgan. Bolaligimizda ota-onam bilan dehqonchilik qilardik. Dadam Abdug‘ofur Qorayev esa urug‘ni yerga qanday qadash kerakligi, uni parvarishlash borasida bilganlarini menga o‘rgatardi. Onam esa bug‘doydan sifatli hosil olish borasida tinimsiz izlanishlar olib borardi. Dehqon xo‘jaligiga oid uyimizda juda ko‘p kitoblar bo‘lardi, ota-onam ushbu kitoblarni o‘qib, o‘rganganlarini amaliyotga tadbiq etishardi.

Dadam Rossiyaning Moskva shahrida o‘qib yurgan kezlari qishloq xo‘jaligi sohasiga qiziqish bildirib, pomidor, bodring kabi sabzavot ekinlarining noyob turlarini chatishtirish, eksportbop mahsulotlar yetishtirish borasida olim va yirik fermerlardan soha sirlarini o‘rganib qaytgan edi. Dadam bundan 20-25 yil ilgari xorijiy tajribalarini amaliyotda qo‘llab, yuqori hosil olish va yangi mahsuldor sabzovotlar navini yetishtirish borasida izlanishlar olib borgan. Jumladan, bugungi kunda bodringdan sifatli hosil olish maqsadida issiqxonalarda bodring ko‘chatlarini ip bilan yuqoriga tarash ishlari olib borilayotgan bo‘lsa, biz bu jarayonlarni bundan 20-25 yil ilgari tomorqamizda amalga oshirgandik. Bahosi oddiy pomidorlarga nisbatan ancha yuqori bo‘lgan gilos (cherri) pomidorlarni ham ilk bor 2000-2005 yillar oralig‘ida yetishtirib ko‘rganmiz. O‘sha kezlari ko‘pchilik bu pomidorga kasallangan pomidor sifatida qaragan, bugungi kunga kelib esa gilos (cherri) pomidor bozorda eng talabgor mahsulotlardan biriga aylangan, – deydi fermer ayol.

Faoliyati davomida ko‘plab to‘siqlarga duch kelgan. Qahramonimiz yaqinlarining “Ayol kishi uyda o‘tirishi kerak” degan fikrlari qurshovida qoladi. Ammo vaqt o‘tgani sari u o‘zining mehnati va ishonchi bilan jamiyatda ayollar ham fermerlik sohasida muvaffaqiyatga erisha olishini isbotladi.

Dono Qorayeva nafaqat yerda mehnat qiladi, balki ijtimoiy tarmoqlarda (Youtube, Instagram) ham faol. Uning Instagramdagi shaxsiy sahifasi (@Fermerka_donosha) ni 25 mingdan ortiq obunachi kuzatadi. Qahramonimiz blogida fermerlik faoliyatini yoritish bilan bir qatorda yoshlar va fermerlarga agrotexnik tavsiyalar beradi.

– Meni ijtimoiy tarmoqlar orqali tanib, shaxsiy blogimni kuzatuvchi obunachilarimning ko‘pchiligi bloger deb o‘ylashadi. Mendan o‘g‘it va dori vositalarini tavsiya qilib berishimni so‘rashadi. Men faqat sinab ko‘rilgan vositalar va usullarni tavsiya qilaman, sinovimdan o‘tmagan mahsulotlarni tavsiya qilishni rad etaman. Sababi har bir fermerlik tavsiyasi amaliy tajribaga asoslangan bo‘lishi zarur, – deydi qahramonimiz.

Tumanimizning ilg‘or fermerlaridan biri Dono Qorayeva jamiyatimizdagi xotin-qizlarning tutgan o‘rni naqadar ortib borayotganining yorqin namunasidir. Fermer ayollar nafaqat o‘z oilasi farovonligi, balki mahalla va jamoatchilik hayotida ham faollik ko‘rsatib, yoshlar, xotin-qizlarning bandligini ta’minlashga ko‘maklashishmoqda. U zamonaviy agrotexnologiyalarni o‘zlashtirib, yerdan samarali foydalanish, serhosil mahsulot yetishtirish hamda yangi ish o‘rinlari yaratish orqali iqtisodiy o‘sishga ham hissa qo‘shmoqda.

Sevara TURG‘UNOVA, “Ohangaron hayoti” muxbiri.