Ohangaron tumanida Xitoy kompaniyalari bilan investitsiyaviy hamkorlik istiqbollari muhokama qilindi
2026-11-04 11:25:00 / Yangiliklar

Ohangaron tumani hokimi Bahrom Norqobilov Xitoy Xalq Respublikasining 10 dan ortiq kompaniyasi vakillaridan iborat delegatsiyani qabul qilib, investitsiyaviy hamkorlik istiqbollariga bag‘ishlangan muzokaralar o‘tkazdi.
Uchrashuvda xitoylik tadbirkorlar tomonidan Ohangaron tumanida bir qator yo‘nalishlarda investitsiyaviy loyihalarni amalga oshirish imkoniyatlari muhokama qilindi. Xususan, qishloq xo‘jaligi, sanoat ishlab chiqarishi, tog‘-kon sanoati, suv texnologiyalari va boshqa istiqbolli sohalarda hamkorlikni yo‘lga qo‘yish bo‘yicha dastlabki takliflar bildirildi.
Muloqot davomida Bahrom Norqobilov mehmonlarga tumanning iqtisodiy va investitsiyaviy salohiyati, mavjud ishlab chiqarish imkoniyatlari, xomashyo resurslari, transport-logistika infratuzilmasi hamda tadbirkorlik faoliyatini tashkil etish uchun yaratilgan sharoitlar haqida atroflicha ma’lumot berdi.
Xitoy kompaniyalari vakillari esa o‘z faoliyat yo‘nalishlaridan kelib chiqib, tumanda istiqbolli loyihalarni joylashtirish, ularni amalga oshirish mexanizmlari, mavjud imkoniyatlardan foydalanish va zarur tashkiliy masalalar yuzasidan ma’lumotlarga ega bo‘ldilar.
Uchrashuvda investitsiya loyihalarini amaliy bosqichga olib chiqish uchun har bir taklifni alohida o‘rganish, loyihalarning iqtisodiy samaradorligini baholash, zarur infratuzilma va resurslar bilan bog‘liq masalalarni ko‘rib chiqish muhimligi qayd etildi.
Samimiy va ishchan ruhda o‘tgan muzokaralar yakunida o‘zaro manfaatli hamkorlikni rivojlantirish, bildirilgan takliflarni chuqur tahlil qilish hamda istiqbolli investitsiya loyihalarini amalga oshirish bo‘yicha keyingi vazifalar belgilab olindi.
Mazkur uchrashuv Ohangaron tumanining xorijiy sarmoyadorlar bilan hamkorlik geografiyasini kengaytirish, yangi ishlab chiqarish quvvatlarini yaratish va iqtisodiyot tarmoqlariga zamonaviy texnologiyalarni jalb etish yo‘lidagi navbatdagi muhim muloqotlardan biri bo‘ldi.



