Ohangaron tumani hokimi Bahrom Norqobilovning "Ichki ishlar organlari xodimlari kuni" munosabati bilan bayram tabrigi
2026-10-24 09:30:00 / Rahbariyatning bayonotlari va nutqlari
HURMATLI ICHKI ISHLAR ORGANLARI XODIMLARI VA SOHA FAXRIYLARI!
Sizlarni 25 oktyabr — Ichki ishlar organlari xodimlari kuni bilan samimiy muborakbod etaman!
Yurtimizda tinchlik va osoyishtalikni ta’minlash, jamoat xavfsizligini asrash, qonuniylikni mustahkamlash, fuqarolarning huquq va erkinliklarini himoya qilishdek sharafli va mas’uliyatli vazifalarni bajarishda sizlarning xizmatingiz alohida ahamiyatga ega.
Bugun ichki ishlar organlari xodimlarining faoliyati faqat huquqbuzarliklarning oldini olish va jinoyatchilikka qarshi kurashish bilan cheklanib qolmayapti. Aholi bilan ochiq muloqot qilish, fuqarolarning muammo va murojaatlariga quloq tutish, mahallalarda sog‘lom ijtimoiy muhitni shakllantirish, yoshlarni turli salbiy ta’sirlardan asrash hamda har bir insonning huquq va manfaatlarini ta’minlash bugungi xizmat faoliyatining muhim yo‘nalishlaridir.
Ohangaron tumani ichki ishlar bo‘limi xodimlari ham hududda jamoat tartibini saqlash, mahallalarda xavfsiz muhitni ta’minlash, huquqbuzarliklarning barvaqt oldini olish va aholi xotirjamligini asrash yo‘lida mas’uliyat bilan mehnat qilib kelmoqda. Ayniqsa, profilaktika inspektorlarining mahallalarda fuqarolar bilan bevosita muloqot qilishi, oilalardagi muammolarga e’tibor qaratishi, yoshlar va ijtimoiy ko‘makka muhtoj insonlar bilan ishlashi jamiyatda o‘zaro ishonch va hamjihatlikni mustahkamlashda muhim o‘rin tutadi.
Eng muhimi, ichki ishlar organlari xodimlari xalqdan ayro emas, balki xalq bilan yonma-yon bo‘lib, uning dardi va tashvishlariga hamohang yashashi, har bir mahallada tinchlikni ta’minlashni o‘zining sharafli burchi deb bilishi lozim. Zero, xalq ishonchiga sazovor bo‘lish, fuqarolar bilan samimiy va adolatli munosabat o‘rnatish, har bir murojaat ortida inson taqdiri turganini his etish — chinakam professionallikning muhim mezonidir.
Ohangaron tumanida osoyishta hayotni ta’minlash, fuqarolarning qonuniy manfaatlarini himoya qilish va jinoyatchilikning oldini olish borasida xizmat qilayotgan barcha ichki ishlar organlari xodimlarining fidokorona mehnati, kasbiy mahorati, jasorati va sadoqatini yuksak qadrlayman. Zimmangizdagi mas’uliyatli vazifalarni vijdonan ado etishingiz, el-yurt tinchligi va farovonligi yo‘lidagi sa’y-harakatlaringiz alohida e’tirofga munosib.
Fursatdan foydalanib, barchangizga mustahkam sog‘liq, oilaviy baxt-saodat, kuch-g‘ayrat va sharafli xizmat faoliyatingizda ulkan muvaffaqiyatlar tilayman. Xizmat yo‘lidagi jasoratingiz va fidoyiligingiz doimo qadr topsin, oilalaringizdan fayzu baraka, xonadonlaringizdan xotirjamlik arimasin.
Yurtimiz tinch, xalqimiz omon, mahallalarimiz osoyishta bo‘lsin!
Bayramingiz muborak bo‘lsin!
Bahrom NORQOBILOV,
Ohangaron tumani hokimi.