Ohangaron tumaniga nasldor qoramol yetkazib berish bo‘yicha xalqaro hamkorlik
2026-10-22 12:25:00 / Yangiliklar
Ayni kunlarda Ohangaron tumani hokimi Bahrom Norqobilov Avstriyada bo‘lib, naslchilik chorvachiligi sohasida xalqaro hamkorlikni rivojlantirish, tuman fermer xo‘jaliklariga yuqori mahsuldor nasldor qoramollarni olib kelish masalalari yuzasidan muzokaralar olib bormoqda.
Tashrif davomida tuman rahbari Avstriyaning Shtiriya federal yeridagi yetakchi naslchilik birlashmalaridan biri, 5 278 ta qishloq xo‘jaligi korxonasini birlashtirgan Rind Steiermark kompaniyasi rahbarlaridan biri Georg Shtayner bilan uchrashdi. Muloqotda qoramollar genetikasini takomillashtirish, naslchilik qiymatini baholash va nasldor hayvonlar savdosini tashkil etish masalalari muhokama qilindi. Hamkorlik doirasida simmental, golshtin va qo‘ng‘ir shvis zotlariga alohida e’tibor qaratiladi.
Shuningdek, Bahrom Norqobilov Polshadagi Przedsiębiorstwo Holstein kompaniyasi boshqaruvi raisi Monika Reshko bilan uchrashdi. Xalqaro savdo va nasldor qoramollar eksportiga ixtisoslashgan mazkur kompaniya Yevropa xo‘jaliklaridan hayvonlarni tanlash, veterinariya tayyorgarligi, eksport hujjatlarini rasmiylashtirish va xalqaro tashuvlarni tashkil etish bilan shug‘ullanadi.
Muzokaralarning asosiy mavzusi Yevropa nasldor qoramollarini O‘zbekistonga yetkazib berish bo‘ldi. Bunda hayvonlarning kelib chiqishi, genetik qiymati, sog‘lig‘i va mahsuldorlik salohiyatini inobatga olgan holda saralash, shuningdek, tuman fermer xo‘jaliklarining ehtiyojlariga mos zotlarni tanlash masalalari ko‘rib chiqildi.
Tashrif doirasida tuman hokimi bir qator fermer xo‘jaliklarida bo‘lib, nasldor qoramol yetishtirish jarayonlari bilan tanishdi.
Ayni paytda erishilgan kelishuvlar doirasida Ohangaron tumaniga nasldor qoramollarni olib kelish ishlari boshlab yuborildi. Jumladan, «Azia Agro baraka» MCHJga «Simental» zotli 270 bosh qoramol olib kelindi. Yaqin vaqtlarda mazkur xo‘jalikka yana 230 bosh naslli qoramol yetkazib berilishi rejalashtirilgan.
Bundan tashqari, tumandagi boshqa fermer xo‘jaliklari uchun ham 1 000 boshdan ortiq naslli qoramol olib kelish ko‘zda tutilgan.