Toshkent viloyati Ohangaron tumani hokimligi

Yettinchi chaqiriq Xalq deputatlari Ohangaron tumani Kengashining 32-sessiyasi bo‘lib o‘tdi. Unda tumanda aholi tashabbuslarini qo‘llab-quvvatlash, jamoatchilik fikri asosida shakllangan loyihalarni moliyalashtirish, deputatlik odob-axloq qoidalarini takomillashtirish hamda hududdagi ijtimoiy va infratuzilmaviy masalalarni hal etishga qaratilgan qator muhim masalalar muhokama qilindi.

Sessiya kun tartibidan to‘rtta masala o‘rin oldi.

Dastlab Ohangaron tumanida 2026-yil ikkinchi mavsumida “Ochiq budjet” axborot portali orqali o‘tkazilgan tashabbusli budjet jarayonlari yakunlari muhokama qilindi. Ma’lumki, mazkur jarayonlar orqali fuqarolar o‘z hududlaridagi mavjud muammolarni hal etish bo‘yicha takliflarini ilgari surish, ularni jamoatchilik muhokamasiga qo‘yish va ovoz berish orqali qo‘llab-quvvatlash imkoniyatiga ega bo‘lmoqda. Bu esa budjet mablag‘larini aholi uchun eng zarur bo‘lgan yo‘nalishlarga yo‘naltirishda fuqarolarning bevosita ishtirokini ta’minlashga xizmat qilmoqda.

Sessiyada 2026-yil ikkinchi mavsumida “Ochiq budjet” axborot portali orqali jamoatchilik fikri asosida eng ko‘p ovoz to‘plab, g‘olib deb topilgan takliflarni amalga oshirish uchun “Fuqarolar tashabbusi jamg‘armasi”dan mablag‘lar ajratish masalasi ko‘rib chiqildi.

Shuningdek, tashabbusli budjet jarayonlarida yuqori natija qayd etgan, biroq belgilangan mezonlar asosida g‘oliblar qatoriga kirmagan loyihani qo‘shimcha tarzda g‘olib deb e’lon qilish masalasi ham muhokama qilindi. Jumladan, 2026-yil ikkinchi mavsumida o‘tkazilgan tashabbusli budjet jarayonlarida 1 112 ta ovoz to‘plagan, ammo g‘olib deb topilmagan keyingi o‘rindagi loyihani qo‘shimcha ravishda g‘olib deb e’lon qilish va unga mablag‘ yo‘naltirish yuzasidan takliflar ko‘rib chiqildi.

Bundan tashqari, deputat tashabbusiga ko‘ra qo‘shimcha ravishda g‘olib deb topilgan loyihalarni O‘zbekiston Respublikasining respublika budjetidan moliyalashtirish masalasi ham sessiya kun tartibidan o‘rin oldi.

Sessiya davomida deputatlik faoliyatini samarali tashkil etish, xalq vakillarining o‘z vazifalarini bajarishda amal qilishi lozim bo‘lgan me’yorlarni yanada takomillashtirishga qaratilgan masala ham muhokama qilindi. Xususan, Xalq deputatlari Ohangaron tumani Kengashining 2023-yil 21-iyuldagi “Xalq deputatlari Ohangaron tumani Kengashi deputatlarining Odob-axloq qoidalarini tasdiqlash to‘g‘risida”gi VI-85-69-10-134-K/23-sonli qaroriga o‘zgartirish kiritish to‘g‘risidagi masala ko‘rib chiqildi. Mazkur o‘zgartirishlar deputatlarning odob-axloq me’yorlariga rioya qilishi, deputatlik maqomidan kelib chiqadigan mas’uliyatni yanada to‘liq anglashi va xalq vakili sifatidagi faoliyatini belgilangan talablar asosida tashkil etish nuqtayi nazaridan muhim ahamiyat kasb etadi.

Sessiyada, shuningdek, “Ohangaron tuman hokimligi huzuridagi “Infratuzilma va ijtimoiy barqarorlik” jamg‘armasi mablag‘larini yo‘naltirish masalasi ham atroflicha muhokama qilindi. Unda jamg‘arma mablag‘laridan hududdagi ijtimoiy ahamiyatga ega masalalarni hal etish, infratuzilmani yaxshilash va aholi uchun qulay shart-sharoitlarni ta’minlashga qaratilgan maqsadlarda samarali foydalanish bilan bog‘liq masalalar ko‘rib chiqildi.

Kun tartibidagi har bir masala yuzasidan deputatlar tomonidan fikr-mulohazalar bildirilib, tegishli takliflar muhokama qilindi. Muhokamalar yakuniga ko‘ra, kun tartibiga kiritilgan masalalar bo‘yicha xalq deputatlari Ohangaron tumani Kengashining tegishli qarorlari qabul qilindi.