TЕMIR YO‘LDA BOLALAR XAVFSIZLIGI — HAR BIR KATTANING MAS’ULIYATI
2026-09-08 10:35:00 / Yangiliklar
Temir yo‘l-yuqori darajadagi xavfli hudud
Temir yo‘l hududi bolalar uchun o‘yin maydoni emas. Poyezdning katta tezligi, og‘irligi va to‘xtash masofasi sababli yo‘lga yaqinlashish yoki belgilanmagan joydan kesib o‘tish og‘ir oqibatlarga olib kelishi mumkin. Ayniqsa, bolalar xavfni to‘liq baholay olmasligi mumkinligi uchun ularga temir yo‘ldagi xavfsizlik qoidalarini doimiy ravishda tushuntirish muhim.
Nega bolalar o‘rtasida baxtsiz holatlar yuz berishi mumkin?
1. Temir yo‘l izlari va vagonlar atrofida o‘ynash yoki qiziqish bilan xavfli hududga kirish.
2. Poyezd yaqinlashganda uning tezligi va to‘xtash masofasini noto‘g‘ri baholash.
3. Telefon, quloqchin yoki boshqa chalg‘ituvchi vositalar sabab atrofdagi signal va poyezd harakatiga e’tibor bermaslik.
4. Temir yo‘lni belgilanmagan joydan kesib o‘tish.
5. Kattalar nazoratisiz bolalarning stansiya, bekat yoki temir yo‘l infratuzilmasiga yaqin hududlarda qolishi.
Bolalarga oddiy va tushunarli qilib o‘rgating!
1. Temir yo‘l izlariga yaqinlashmaslik va u yerda o‘ynamaslik.
2. Poyezdni ko‘rish uchun yo‘lga yaqin turmaslik.
3. Temir yo‘lni faqat belgilangan piyodalar o‘tish joyi, ko‘prik yoki tunnel orqali kesib o‘tish.
4. Poyezd yaqinlashganda shoshmasdan, xavfsiz masofada kutish.
5. Telefon va quloqchindan foydalanib ketayotganda atrofga e’tiborni susaytirmaslik.
6. Vagonlarga chiqish, vagonlar orasida turish yoki harakatlanayotgan poyezdga yaqinlashishga urinmaslik.
Ota-ona va kattalarga murojaat
Bolaning xavfsizligi faqat uning o‘ziga bog‘liq emas. Ota-ona, o‘qituvchi va kattalar temir yo‘lda yurish madaniyatini shaxsiy namuna bilan ko‘rsatishi, bolaga xavfli joylarni oldindan tushuntirishi va uni nazoratsiz qoldirmasligi kerak. Bir necha daqiqalik beparvolik o‘rnini to‘ldirib bo‘lmaydigan oqibatlarga olib kelishi mumkin.
Eslab qoling: TO‘XTA-QARA-KUT-XAVFSIZ O‘T!
Temir yo‘lda har bir inson qoidaga amal qilishi shart. Bolalarga xavfsizlik qoidalarini qancha erta va qancha ko‘p tushuntirsak, baxtsiz hodisalarning oldini olish imkoniyati shuncha yuqori bo‘ladi.
«BIR DAQIQALIK EHTIYOTKORLIK – BIR UMRLIK XAVFSIZLIK!»
Ogoh bo‘ling! Temir yo‘l hududida xavfsizlik qoidalariga qat’iy amal qiling!
Saidakbar Nurmahamedov, Toshkent mintaqasi temir yo‘l transportida XTB HPB boshlig‘i.
Ilhom Ismailov, “Ohangaron” bekatida XTB HPG inspektori.