Fuqarolar murojaatlari bilan ishlash mas’ullari ishtirokida muhokama yig‘ilishi o‘tkazildi
2026-09-04 11:05:00 / Yangiliklar
Ohangaron tumanida aholi murojaatlarini o‘z vaqtida ko‘rib chiqish, ularda ko‘tarilgan masalalarni chuqur o‘rganish va murojaatlarning amaliy yechimini ta’minlash borasidagi ishlarga alohida e’tibor qaratilmoqda.
Shu maqsadda tuman Xalq qabulxonasi mudiri o‘rinbosari Ma’ruf Toshboyev rahbarligida tuman tashkilotlarida murojaatlar bilan ishlashga mas’ul xodimlar ishtirokida muhokama yig‘ilishi bo‘lib o‘tdi.
Yig‘ilishda tashkilotlarda murojaatlar bilan ishlash tizimining bugungi holati atroflicha tahlil qilinib, fuqarolardan kelib tushayotgan murojaatlarni qabul qilish, ularni belgilangan tartibda ko‘rib chiqish, mas’ul ijrochilarga yo‘naltirish hamda yakuniy natijasi bo‘yicha fuqaroga asosli ma’lumot berish jarayonlariga e’tibor qaratildi.
Muloqot davomida murojaatlar bilan ishlashda yo‘l qo‘yilayotgan ayrim kamchiliklar tanqidiy-tahliliy ruhda muhokama qilindi. Xususan, murojaatlarda ko‘tarilgan masalalarni chuqur o‘rganmaslik, ayrim holatlarda muammoning mazmun-mohiyatidan kelib chiqmagan holda yuzaki javoblar berish, murojaatlarni ko‘rib chiqish muddatlariga e’tibor qaratmaslik kabi holatlarning oldini olish zarurligi ta’kidlandi.
Qayd etilganidek, har bir murojaat ortida insonning muayyan muammosi, ehtiyoji yoki qonuniy talabi turganini inobatga olgan holda, mas’ul xodimlar murojaatlarga rasmiyatchilik nuqtayi nazaridan emas, balki inson qadri, uning manfaati va muammoning amaliy yechimi nuqtayi nazaridan yondashishi lozim.
Yig‘ilishda murojaatlar bilan ishlash samaradorligini oshirish, mas’ul xodimlarning bu boradagi bilim va ko‘nikmalarini yanada mustahkamlash, har bir murojaatni nazoratga olish va uning natijadorligini ta’minlash yuzasidan tegishli tavsiyalar berildi.
Mas’ullarga aholi bilan muloqot madaniyatiga qat’iy rioya qilish, murojaatlarni belgilangan muddatlarda sifatli ko‘rib chiqish, fuqarolarning qonuniy talablarini e’tiborsiz qoldirmaslik hamda murojaatlar takroriy tus olishining oldini olish bo‘yicha aniq vazifalar belgilab berildi.
Zero, fuqaro murojaatining ijobiy hal etilishi — insonning davlat idoralariga bo‘lgan ishonchini mustahkamlaydi. Shu bois murojaatlar bilan ishlashga mas’ul har bir xodim o‘z vazifasiga yuksak mas’uliyat bilan yondashishi, har bir murojaatni inson taqdiri bilan bog‘liq muhim masala sifatida qabul qilishi zarur.