O‘zbekiston Respublikasi davlat mustaqilligining 35 yilligi munosabati bilan Ohangaron tumani hokimi Bahrom Norqobilovning bayram tadbiridagi nutqi
2026-08-23 21:10:00 / Rahbariyatning bayonotlari va nutqlari
Assalomu alaykum, qadrli yurtdoshlar, aziz tumandoshlar, muhtaram mehmonlar!
Avvalo, barchangizni xalqimiz uchun eng ulug‘, eng aziz va eng qadrli bayram — O‘zbekiston Respublikasi davlat mustaqilligining 35 yilligi bilan chin qalbimdan samimiy muborakbod etaman!
Barchangizga mustahkam sog‘lik, oilaviy xotirjamlik, fayzu baraka, baxt va omad tilayman.
Mustaqillik bu – shunchaki bir sana yoki bayram emas.
Mustaqillik bu – xalqning o‘z taqdirini o‘zi belgilash huquqi.
Mustaqillik bu – milliy qadriyatlarimiz, tilimiz, dinimiz, urf-odat va an’analarimizni asrab-avaylash, ularni kelgusi avlodlarga yetkazish imkoniyati.
Mustaqillik bu – farzandlarimiz kelajagiga ishonch bilan qarash, yurtimizning ertangi kunini o‘z qo‘limiz bilan barpo etish mas’uliyatidir.
Shu ma’noda, 35 yillik tariximizga nazar tashlar ekanmiz, bu davr xalqimiz hayotida tub burilishlar, ulkan o‘zgarishlar va yuksalishlar davri bo‘lganini ko‘ramiz.
Bugun O‘zbekiston jahon hamjamiyatida o‘zining munosib o‘rniga ega bo‘lgan, ulkan iqtisodiy va inson salohiyatiga ega, taraqqiyot sari dadil odimlayotgan davlat sifatida e’tirof etilmoqda.
Ayniqsa, so‘nggi yillarda Muhtaram Prezidentimiz Shavkat Miromonovich Mirziyoyev rahnamoligida mamlakatimizda inson qadrini yuksaltirish, aholi farovonligini oshirish, tadbirkorlikni qo‘llab-quvvatlash, yangi ish o‘rinlari yaratish, ta’lim va tibbiyot sifatini oshirish, hududlar infratuzilmasini yaxshilashga qaratilgan keng ko‘lamli islohotlar hayotimizda o‘zining amaliy natijalarini namoyon etmoqda.
Bugungi bayram shu yuksalishlar haqida gapirish, erishgan natijalarimizni sarhisob qilish bilan birga, oldimizda turgan vazifalarni belgilab olish uchun ham muhim fursatdir.
Aziz tumandoshlar!
Ohangaron tumani ham mustaqillik yillarida katta taraqqiyot yo‘lini bosib o‘tdi. Tumanimiz bugun sanoat, qishloq xo‘jaligi, tadbirkorlik, investitsiya, ijtimoiy sohalar va turizm borasida o‘z salohiyatini tobora keng namoyon etayotgan hududlardan biriga aylanib bormoqda.
Raqamlarga murojaat qiladigan bo‘lsak, so‘nggi o‘n yil davomida Ohangaron tumani iqtisodiyotidagi o‘zgarishlar ko‘lami nihoyatda katta bo‘lganini ko‘ramiz.
Xususan, sanoat mahsulotlari ishlab chiqarish hajmi 8 barobarga o‘sib, 1,2 trillion so‘mdan 9,8 trillion so‘mga yetdi. Hududda 345 ta yangi sanoat korxonasi tashkil etildi. Bu – yangi ish o‘rinlari, yangi imkoniyatlar, oilalar daromadining ortishi va tuman iqtisodiy salohiyatining yuksalishi deganidir. Kichik biznes va xususiy tadbirkorlikni qo‘llab-quvvatlash borasidagi islohotlar natijasida tadbirkorlik subyektlari soni 273 tadan 1132 taga yetdi.
Bu raqamlar ortida o‘z biznesini boshlagan, oilasi farovonligini ta’minlayotgan, yangi ish o‘rinlari yaratayotgan minglab insonlarning mehnati va tashabbusi mujassam.
Shuning uchun ham bugungi bayramda tumanimiz tadbirkorlariga, ishbilarmon va tashabbuskor insonlariga alohida minnatdorlik bildirmoqchiman.
Sizlarning jasoratingiz, yangilikka intilishingiz va mehnatingiz Ohangaronning iqtisodiy qudratini oshirishda muhim ahamiyat kasb etmoqda.
Hurmatli yurtdoshlar!
Ohangaron tumanida investitsiya yo‘nalishida ham katta natijalarga erishildi. Keyingi yillarda tuman iqtisodiyotiga 2,9 milliard AQSH dollari miqdorida xorijiy investitsiyalar jalb qilinib, 55 ta investitsion loyiha amalga oshirildi.
Natijada zamonaviy ishlab chiqarish korxonalari ishga tushirilib, 6115 ta yangi ish o‘rni yaratildi.
Bu raqamlar tumanimizga investorlarning qiziqishi ortib borayotganini, Ohangaronning iqtisodiy va investitsion salohiyati tobora yuksalayotganini ko‘rsatadi.
Albatta, biz bu natijalar bilan cheklanib qolmasligimiz kerak.
Oldimizdagi eng muhim vazifalardan biri — yangi investitsiyalarni jalb etish, zamonaviy ishlab chiqarishlarni yo‘lga qo‘yish, yangi ish o‘rinlari yaratish va aholi daromadlarini yanada oshirishdan iborat.
Qadrli tumandoshlar!
Ohangaron — qishloq xo‘jaligi uchun ham katta imkoniyatlarga ega hudud. So‘nggi yillarda sohada zamonaviy agrotexnologiyalarni joriy etish, yerlarning unumdorligini oshirish, intensiv bog‘ va tokzorlar barpo etish borasida salmoqli ishlar amalga oshirildi. So‘nggi o‘n yilda 1232 gektar intensiv bog‘lar va 1361 gektar tokzorlar tashkil etildi. Bu yerlar bugun nafaqat qishloq xo‘jaligi mahsulotlari yetishtirish manbai, balki minglab aholi uchun daromad va bandlik imkoniyatidir.
Chorvachilik sohasida ham ko‘rsatkichlarimiz salmoqli. Tumanda qoramollar soni 21 500 boshdan 80 219 boshga, mayda shoxli mollar soni 181 000 boshdan 286 032 boshga yetdi. Yil yakuniga qadar chet eldan yana 30 ming bosh nasldor chorva mollarini olib kelish rejalashtirilgan.
Go‘sht ishlab chiqarish hajmi 7,2 ming tonnadan 21 ming tonnaga, sut ishlab chiqarish 48 ming tonnadan 69 ming tonnaga, tuxum yetishtirish esa 86,6 million donadan 106,6 million donaga oshdi.
Bu natijalarni biz, avvalo, qishloq mehnatkashlarining mashaqqatli va halol mehnati natijasi sifatida baholaymiz.
Shu munosabat bilan fermer va dehqonlarimizga, chorvadorlarimizga, klaster va xo‘jaliklar rahbarlariga, umuman, yerga mehr bilan mehnat qilayotgan barcha insonlarga samimiy tashakkur bildiraman.
Azizlar!
Xalq farovonligi haqida gapirganda, avvalo, insonning kundalik hayotiga bevosita ta’sir qiladigan sharoitlar haqida o‘ylashimiz kerak.
Shu bois, keyingi yillarda tumanimizda muhandislik-kommunikatsiya va kommunal infratuzilmani yaxshilashga alohida e’tibor qaratildi.
Buning natijasida aholining ichimlik suvi bilan ta’minlanish darajasi 32 foizdan 70 foizga yetkazildi. 210 kilometr ichimlik suvi tarmoqlari, 31 kilometr elektr tarmoqlari hamda 17,2 kilometr gaz quvurlari qurildi va rekonstruksiya qilindi. 157 kilometr ichki yo‘llar ta’mirlandi. «Tashabbusli budjet» loyihasi doirasida esa jami 72 ta loyihaga 89,3 milliard so‘m mablag‘ yo‘naltirildi.
Bularning barchasi odamlarning kundalik hayotini yengillashtirish, mahallalarni obod qilish va aholi uchun munosib sharoit yaratishga qaratilgan.
Shu bilan birga, biz bu boradagi ishlarni hali yakunlangan, deb hisoblamaymiz. Chunki xalqimiz ehtiyoji, odamlarning talab va istaklari biz uchun eng muhim mezondir.
Qaysi mahallada yo‘l muammosi bor — o‘sha yerda ishlashimiz kerak.
Qaysi xonadonga ichimlik suvi yetib bormayotgan bo‘lsa — bu masalani hal etishimiz kerak.
Qaysi hududda elektr ta’minoti bilan bog‘liq muammo bo‘lsa — uni bartaraf etish zarur.
Biz uchun har bir mahalla, har bir ko‘cha va har bir xonadonning farovonligi muhim.
Aziz tumandoshlar!
Mustaqillikning eng katta boyligi — INSON.
Shuning uchun ijtimoiy himoya, aholi salomatligi, ta’lim va yoshlar masalasiga alohida e’tibor qaratib kelinmoqda. Kam ta’minlangan oilalar, nogironligi bo‘lgan shaxslar, keksalar, yoshlar va xotin-qizlarni qo‘llab-quvvatlash maqsadida, «Temir daftar», «Ayollar daftari» va «Yoshlar daftari» orqali minglab fuqarolarning muammolari hal etildi.
Bu boradagi ishlarning mohiyati — insonni muammosi bilan yolg‘iz qoldirmaslik, uni qo‘llab-quvvatlash, mehnat qilib, munosib hayot kechirishi uchun imkoniyat yaratishdir.
Shuningdek, tumanimizda ta’lim sohasida ham muhim natijalarga erishildi. Keyingi yillarda 20 ta maktab va 24 ta davlat maktabgacha ta’lim tashkiloti binolari qurildi va rekonstruksiya qilindi. Oilaviy nodavlat maktabgacha ta’lim tashkilotlari soni 62 taga yetdi. Bolalarning maktabgacha ta’lim bilan qamrovi 48,3 foizdan 79,8 foizga oshdi. Bu — farzandlarimiz kelajagiga kiritilayotgan eng muhim sarmoyalardan biridir. Chunki bugun ta’limga e’tibor bersak, ertaga bilimli, salohiyatli va Vatan taqdiriga daxldor yosh avlodni ko‘ramiz.
Shu o‘rinda, farzandlarimizni tarbiyalayotgan ota-onalarga, yosh avlodga ta’lim va tarbiya berayotgan ustozlarga alohida minnatdorchilik bildiraman.
Qadrli yurtdoshlar!
So‘nggi yillarda tumanimizda aholi salomatligini muhofaza qilish borasida ham salmoqli ishlar amalga oshirildi. 17 ta tibbiyot muassasasi qurildi va kapital ta’mirlandi. Zamonaviy tibbiy jihozlar bilan ta’minlash uchun 34 milliard so‘m mablag‘ yo‘naltirildi. Bugun aholiga tibbiy xizmat ko‘rsatish imkoniyatlari kengayib, zamonaviy tibbiy uskunalardan foydalanish ko‘lami ortmoqda.
Albatta, tibbiyotda bino va jihozning o‘zi yetarli emas. Eng asosiysi — bemorga mehr, e’tibor va mas’uliyat bilan munosabatda bo‘lish.
Shuning uchun sog‘liqni saqlash tizimida mehnat qilayotgan barcha shifokor va tibbiyot xodimlariga o‘z nomimdan hamda tuman aholisi nomidan minnatdorlik bildiraman.
Hurmatli mehmonlar, aziz tumandoshlar!
Ohangaron tumanining imkoniyatlari faqat sanoat yoki qishloq xo‘jaligi bilan cheklanmaydi.
Tumanimizning boy tarixi, madaniy merosi va betakror tabiati turizmni rivojlantirish uchun katta imkoniyat beradi.
So‘nggi yillarda turistlar oqimi 9,3 barobarga oshgani ham bu salohiyatdan samarali foydalanish imkoniyatlari keng ekanini ko‘rsatmoqda.
Yangi mehmonxonalar, dam olish maskanlari va xizmat ko‘rsatish obyektlarining tashkil etilishi tumanimizda xizmatlar sohasini yanada rivojlantirish uchun muhim qadam bo‘lmoqda.
Biz kelgusida ham Ohangaronning tarixiy va tabiiy imkoniyatlarini keng targ‘ib etish, sayyohlar uchun qulay sharoitlar yaratish, xizmat ko‘rsatish sifatini oshirish borasida ishlarni davom ettiramiz.
Aziz yurtdoshlar!
Bugun biz erishilgan natijalarni sanar ekanmiz, bir haqiqatni chuqur anglaymiz – bu yutuqlarning barchasi, avvalo, xalqimizning mehnati va ishonchi bilan yaratilgan.
Mahalla raisi va faolidan tortib, oddiy ishchigacha, fermeru tadbirkordan tortib, o‘qituvchi va shifokorgacha — har bir insonning mehnati bugungi Ohangaron qiyofasida o‘z aksini topgan.
Shuning uchun bugungi bayramda barcha tumandoshlarimizga samimiy minnatdorlik bildiraman.
Ayniqsa, hayotning turli sinovlarini yelkasida ko‘tarib, yurtimiz taraqqiyotiga o‘z hissasini qo‘shgan muhtaram nuroniylarimizga alohida ehtiromimizni izhor etaman.
Sizlarning hayotiy tajribangiz, duolaringiz, farzandlar va yoshlarga berayotgan o‘gitlaringiz biz uchun katta ma’naviy tayanchdir.
Shu o‘rinda, yoshlarimizga ham murojaat qilmoqchiman.
Aziz yoshlar!
Bugun yurtimizda sizlar uchun keng imkoniyatlar va munosib sharoitlar yaratilmoqda. Prezidentimiz rahbarligida yoshlarni qo‘llab-quvvatlash, ularning bilim olishi, zamonaviy kasb-hunarlarni egallashi, o‘z iqtidori va salohiyatini namoyon etishi uchun yangi imkoniyatlar eshigi ochilmoqda.
Bilim olish, sifatli ta’limga ega bo‘lish, kasb-hunar o‘rganish, tadbirkorlik bilan shug‘ullanish, xorijiy tillarni o‘zlashtirish, zamonaviy axborot texnologiyalarini egallash, startap va innovatsion loyihalarni amalga oshirish uchun zarur sharoitlar yaratilmoqda. Yoshlarning bandligini ta’minlash, ularni tadbirkorlikka jalb etish, imtiyozli kredit va subsidiyalar orqali qo‘llab-quvvatlashga alohida e’tibor qaratilmoqda.
Eng muhimi, bugungi O‘zbekistonda yoshlar o‘z g‘oyasi, tashabbusi va iqtidori bilan katta maqsadlar sari intilishi uchun imkoniyat bor. Prezidentimiz ta’kidlayotganidek, yoshlarga ishonch bildirish, ularning orzu-intilishlarini qo‘llab-quvvatlash — Yangi O‘zbekiston taraqqiyotining muhim omillaridan biridir.
Shuning uchun, aziz yoshlar, o‘z oldingizga katta va ezgu maqsadlar qo‘ying. Vaqtingizni qadrlang, bilim olishdan, izlanishdan va yangi narsalarni o‘rganishdan to‘xtamang. Bugun egallagan bilim va ko‘nikmangiz ertangi hayotingiz, oilangiz va jamiyatimiz taraqqiyoti uchun mustahkam poydevor bo‘ladi.
Sizlarning har bir yutug‘ingiz — avvalo, o‘zingizning muvaffaqiyatingiz, shu bilan birga, Ohangaronning, Toshkent viloyatining va butun O‘zbekistonning yutug‘idir.
Qadrli tumandoshlar!
Mustaqillik bizga ulkan imkoniyatlar bilan birga katta mas’uliyat ham yukladi.
Endi oldimizdagi vazifa — erishilgan natijalarni yanada mustahkamlash, tumanimizni har tomonlama rivojlantirish, aholi turmush darajasini oshirish va Ohangaronni yanada obod hududga aylantirishdir.
Biz har bir mahallada ish o‘rinlari ko‘payishi, oilalar daromadi oshishi, tadbirkorlik rivojlanishi, zamonaviy ishlab chiqarishlar tashkil etilishi uchun harakat qilamiz.
Jumladan, joriy yil yakuniga qadar sanoat mahsulotlari ishlab chiqarish hajmi 11 668,3 mlrd. so‘mga yetkazilib, o‘sish sur’atini 105,2 foizga, bozor xizmatlari ko‘rsatish 1 012,6 mlrd. so‘mga yetkazilib, o‘sish sur’ati 116,7 foizga, qishloq, o‘rmon va baliqchilik xo‘jaligi mahsulotlari yetishtirish hajmi 2 737,7 mlrd. so‘mga yetkazilib, o‘sish sur’ati 106,7 foizga, qurilish ishlari hajmi 1 096,5 mlrd. so‘mga yetkazilib, o‘sish sur’atini 115,1 foiz yetkazish maqsad qilib olingan.
Yo‘llar, ichimlik suvi, elektr energiyasi, obodonlashtirish, ta’lim, tibbiyot va boshqa sohalardagi mavjud masalalarni hal etishda aholi bilan birga ishlaymiz. Chunki biz uchun bosh mezon — natija. Odamlarning hayotidagi ijobiy o‘zgarish — eng katta natija. Fuqaroning roziligi esa — eng katta baho. Oiladagi xotirjamlik va farzandlarning baxtli kelajagi — eng oliy maqsadimizdir.
Biz bu yo‘lda xalq bilan birga, mahalla bilan birga, nuroniylarimiz duosi va yoshlarimiz g‘ayratiga tayanib harakat qilamiz.
Qadrli tumandoshlar!
Bugungi shodiyonada yana bir bor mustaqilligimizning naqadar buyuk ne’mat ekanini his etyapmiz. Biz tinch va osmoni musaffo yurtda, farzandlarimiz bag‘rida, oilamiz davrasida bayram qilayotganimiz uchun shukronalar aytamiz.
Bu tinchlikni asrash, uning qadriga yetish, yurtimiz taraqqiyotiga munosib hissa qo‘shish — barchamizning muqaddas burchimiz.
Mustaqilligimiz abadiy bo‘lsin!
Yurtimiz osmoni doimo musaffo bo‘lsin!
Xalqimiz tinch va farovon hayot kechirsin!
Oilalarimizdan fayzu baraka, xonadonlarimizdan kulgu va shodlik arimasin!
Farzandlarimiz sog‘lom, bilimli, baxtli va Vatanga munosib insonlar bo‘lib kamol topsin!
Ohangaron tumani yanada obod va farovon hududga aylansin!
Barchangizni O‘zbekiston Respublikasi davlat mustaqilligining 35 yilligi bilan yana bir bor chin qalbimdan muborakbod etaman!
Muhtaram Yurtboshimiz asos solgan Yangi O‘zbekiston taraqqiyoti yo‘lida xalqimizga kuch-quvvat, xonadonlarimizga tinchlik-xotirjamlik va yurtimizga ravnaq tilayman!
Bayramingiz muborak bo‘lsin, aziz tumandoshlar!
Bahrom NORQOBILOV,
Ohangaron tumani hokimi.