Ohangaron tumanida 80 million dollarlik investitsiya loyihasi muhokama qilindi
2026-07-20 11:30:00 / Yangiliklar
Ohangaron tumani hokimi Bahrom Norqobilov Xitoyning SUNVERA SOLAR PTE. LTD. kompaniyasi vakillarini qabul qildi. Uchrashuvda ikki tomonlama hamkorlikni yo‘lga qo‘yish va tumanda zamonaviy sanoat loyihasini amalga oshirish masalalari muhokama etildi.
Muzokaralar davomida xorijlik investorlar umumiy qiymati 80 million AQSH dollari bo‘lgan investitsiya loyihasi taqdimotini o‘tkazdi. Loyiha doirasida Ohangaron tumanida quyosh batareyalarini ishlab chiqarish hamda ularni ichki va tashqi bozorlarga yetkazib berish yo‘lga qo‘yilishi rejalashtirilgan.
Investorlar tomonidan loyihani to‘liq amalga oshirish uchun taxminan 8 gektar yer maydoni talab etilishi qayd etildi. Shu munosabat bilan tuman hokimligi loyihani amalga oshirishda amaliy ko‘mak ko‘rsatishga tayyor ekanini bildirib, investorlarga sanoat zonasi hududidan munosib yer maydonlari taklif etilishi ma’lum qilindi.
Uchrashuvda loyihaning texnik va tashkiliy jihatlari, ishlab chiqarish quvvatlari, infratuzilma imkoniyatlari hamda hamkorlikning keyingi bosqichlari yuzasidan dastlabki fikr almashildi.
Tomonlar mazkur investitsiya loyihasini amalga oshirish bo‘yicha hamkorlikni davom ettirishga kelishib oldi. Muzokaralar keyingi bosqichlarda ham izchil tarzda davom ettirilishi rejalashtirilgan.