Toshkent viloyati Ohangaron tumani hokimligi

Hurmatli mehmonlar!

Qadrli investorlar va hamkorlar!

 

Barchangizni bugungi tarixiy voqea — Ohangaron tumanida barpo etilgan “Enco Group” mas’uliyati cheklangan jamiyati qo‘shma korxonasining ishga tushirilish marosimi bilan samimiy muborakbod etaman.

 

Bugungi tadbir nafaqat yangi sanoat korxonasining ochilishi, balki mamlakatimiz iqtisodiy taraqqiyoti, sanoatlashtirish siyosati va investitsiyalarni jalb qilish borasida amalga oshirilayotgan keng ko‘lamli islohotlarning yana bir amaliy natijasidir.

 

So‘nggi yillarda muhtaram Prezidentimiz rahnamoligida mamlakatimizda tadbirkorlikni qo‘llab-quvvatlash, investorlar uchun qulay ishbilarmonlik muhitini shakllantirish, zamonaviy sanoat ishlab chiqarishlarini tashkil etish hamda hududlarning iqtisodiy salohiyatini yuksaltirishga qaratilgan tizimli ishlar amalga oshirilmoqda.

 

Ayniqsa, xorijiy va mahalliy investorlar uchun soliq va bojxona imtiyozlari, yer ajratish, muhandislik-kommunikatsiya tarmoqlariga ulanish, moliyaviy qo‘llab-quvvatlash hamda davlat xizmatlarini raqamlashtirish bo‘yicha yaratilgan keng imkoniyatlar mamlakatimizni investitsiya kiritish uchun eng jozibador hududlardan biriga aylantirmoqda.

 

Bugungi kunda ana shu imkoniyatlardan samarali foydalanib kelayotgan hududlardan biri, shubhasiz, Ohangaron tumanidir.

 

Tumanimiz geografik joylashuvi, tabiiy resurslari, rivojlangan transport va logistika infratuzilmasi, malakali mehnat resurslari hamda sanoat ishlab chiqarishini tashkil etish uchun qulay sharoitlari bilan investorlarning diqqat markazida bo‘lib kelmoqda.

 

So‘nggi yillarda Ohangaron tumanida sanoat sohasi mutlaqo yangi bosqichga ko‘tarildi. Yangi ishlab chiqarish quvvatlari tashkil etilmoqda, eksportbop va import o‘rnini bosuvchi mahsulotlar ishlab chiqarish hajmi ortib bormoqda, sanoat zonalari faoliyati kengaymoqda.

 

Eng muhimi, dunyoning turli mamlakatlaridan bo‘lgan investorlarning tumanimizga bo‘lgan qiziqishi yil sayin ortib bormoqda. Bu esa amalga oshirilayotgan islohotlarning to‘g‘riligi, hududning iqtisodiy salohiyati yuqoriligi hamda davlat va investor o‘rtasidagi o‘zaro ishonch mustahkamlanayotganining yorqin dalilidir.

 

Bugun ishga tushirilayotgan “Enco Group” MCHJ QK korxonasi ham ana shunday istiqbolli va muhim loyihalardan biridir.

 

To‘g‘ridan to‘g‘ri xorijiy investitsiyalar hisobidan amalga oshirilgan mazkur loyihaga jami 57,5 million AQSH dollari miqdorida mablag‘ yo‘naltirildi.

Tumanimizning “Tut” mahallasi hududida 21 gektar maydonda barpo etilgan ushbu zamonaviy sanoat majmuasi 485 nafar fuqaromizni doimiy ish o‘rni bilan ta’minlaydi.

 

Bu esa yuzlab oilalarning daromadi oshishi, aholi bandligining ta’minlanishi va mahalliy iqtisodiyotning yanada mustahkamlanishiga xizmat qiladi.

 

Loyiha doirasida yiliga 24 ming tonna yuqori kuchlanishli kabel mahsulotlari, mis trubkalari va izolyatsiyalangan mis shinalari ishlab chiqarish quvvati yaratilgani alohida ahamiyatga ega.

 

Eng muhimi, mazkur korxona faoliyati natijasida respublikamizda ilk bor 110 kilovolt, 220 kilovolt va 330 kilovoltli yuqori kuchlanishli kabel mahsulotlarini mahalliylashtirilgan holda ishlab chiqarish yo‘lga qo‘yilmoqda.

 

Bu nafaqat sanoat sohasidagi muhim texnologik yutuq, balki mamlakatimiz energetika, qurilish va infratuzilma tarmoqlari uchun strategik ahamiyatga ega bo‘lgan mahsulotlarni mahalliy ishlab chiqarish imkoniyatini yaratadi.

 

Natijada bugunga qadar import orqali keltirilayotgan mazkur mahsulotlarga bo‘lgan ehtiyojning katta qismi ichki ishlab chiqarish hisobiga qoplanadi va import hajmi qariyb 60 foizga qisqaradi. Bu esa mamlakatimiz iqtisodiyoti uchun valyuta mablag‘larini tejash, tashqi bozorlarga qaramlikni kamaytirish hamda milliy sanoat raqobatbardoshligini oshirishga xizmat qiladi.

 

Bunday loyihalar nafaqat iqtisodiy samara, balki yuqori texnologiyalar transferi, ilg‘or ishlab chiqarish tajribalarini joriy etish, mahalliy mutaxassislarning malakasini oshirish va sanoat kooperatsiyasini kengaytirish nuqtayi nazaridan ham muhim ahamiyat kasb etadi.

 

Fursatdan foydalanib, mazkur yirik investitsiya loyihasini amalga oshirishda ishtirok etgan investorlar, hamkorlar, muhandislar, qurilish tashkilotlari, mutaxassislar va barcha mehnat jamoasiga samimiy minnatdorlik bildiraman.

 

Ishonchim komilki, “Enco Group” korxonasi yaqin yillarda nafaqat mamlakatimiz ichki bozorida, balki xalqaro bozorlarda ham munosib o‘rin egallaydigan, yuqori sifatli va raqobatbardosh mahsulotlar ishlab chiqaruvchi yetakchi sanoat korxonalaridan biriga aylanadi.

 

Bugungi quvonchli voqea bilan barchangizni yana bir bor tabriklayman. Korxona faoliyatiga ulkan muvaffaqiyatlar, investorlarimizga yangi zafarlar, mehnat jamoasiga esa barqaror rivojlanish va yuksak natijalar tilayman.

 

E’tiboringiz uchun rahmat!