Toshkent viloyati Ohangaron tumani hokimligi

Ohangaron tumani hokimi Bahrom Norqobilov raisligida navbatdagi “Hokimlik soati” yig‘ilishi o‘tkazildi. Unda dolzarb bo‘lgan bir qator masalalar tanqidiy-tahliliy ruhda ko‘rib chiqildi.

Yig‘ilish avvalida ijro intizomi va nazorat ishlarining holati atroflicha muhokama qilindi. Mas’ul tashkilotlar tomonidan topshiriqlarni o‘z vaqtida va sifatli bajarish, hujjatlar ijrosini ta’minlash borasidagi kamchiliklar tanqid qilindi hamda ularni bartaraf etish yuzasidan aniq vazifalar belgilab berildi.

Shuningdek, jismoniy va yuridik shaxslar murojaatlari bilan ishlash holati tahlil qilindi. Fuqarolardan kelib tushayotgan ariza va shikoyatlarni o‘z vaqtida ko‘rib chiqish, ularning qonuniy yechimini ta’minlash, murojaatlar bilan ishlashda mas’uliyatni yanada oshirish lozimligi ta’kidlandi.

Yig‘ilishda “Yashil makon” umummilliy loyihasining 2026-yil bahorgi mavsumi doirasida amalga oshirilayotgan ishlarga ham alohida e’tibor qaratildi. Xususan, daraxt ko‘chatlari ekish ishlarini jadallashtirish, hududlarni ko‘kalamzorlashtirish, ekilayotgan ko‘chatlarning parvarishini ta’minlash masalalari muhokama qilindi. Mas’ullarga belgilangan rejalarni o‘z vaqtida va sifatli bajarish bo‘yicha topshiriqlar berildi.

Shu bilan birga, qishloq xo‘jaligi sohasidagi mavjud imkoniyatlardan to‘liq foydalanish, g‘allachilik, pillachilik hamda kartoshka ekish ishlarini izchil tashkil etish, aholi tomorqalarida yuqori hosildorlikka erishish orqali oziq-ovqat xavfsizligini ta’minlash masalalari muhokama etildi.

Yig‘ilish yakunida belgilangan vazifalar ijrosini ta’minlash yuzasidan mas’ullarga aniq topshiriqlar berildi hamda har bir yo‘nalish bo‘yicha shaxsiy mas’uliyat kuchaytirilishi ta’kidlandi.