Ohangaron tumani hokimi Bahrom Norqobilov “Mahalla tizimi xodimlari kuni” munosabati bilan bayram tabrigi
2026-03-22 09:03:00 / Rahbariyatning bayonotlari va nutqlari
Hurmatli mahalla tizimi xodimlari!
Aziz va fidoyi mahalla faollari!
Sizlarni “Mahalla tizimi xodimlari kuni” munosabati bilan samimiy muborakbod etaman!
Mahalla — xalqimiz hayotida alohida o‘rin tutadigan, azaldan insonlarni birlashtirib kelayotgan, mehr-oqibat, hamjihatlik va o‘zaro hurmat muhitini qaror toptiruvchi muqaddas maskandir. U nafaqat ijtimoiy institut, balki milliy qadriyatlarimizni asrab-avaylash, yosh avlodni tarbiyalash va jamiyatda barqarorlikni ta’minlashda muhim o‘ringa ega bo‘lgan hayotiy maktabdir.
Siz — mahalla tizimi xodimlari ana shu muqaddas dargohning fidoyi va mas’uliyatli vakillarisiz. Har biringiz aholi dardini tinglash, muammolarga yechim topish, kam ta’minlangan oilalarni qo‘llab-quvvatlash, yoshlar va ayollar bilan ishlash, jamiyatda sog‘lom ma’naviy muhitni shakllantirish kabi o‘ta muhim vazifalarni sidqidildan ado etib kelmoqdasiz.
Bugungi kunda yurtimizda mahalla institutini yanada rivojlantirish, uning imkoniyat va vakolatlarini kengaytirish, aholi bilan ishlash samaradorligini oshirishga alohida e’tibor qaratilmoqda. Bu esa sizlarning zimmangizga yanada katta mas’uliyat yuklaydi.
Ayniqsa, “Mahallani rivojlantirish va jamiyatni yuksaltirish yili”da mahallalarda obodonlashtirish ishlarini amalga oshirish, aholi bandligini ta’minlash, ijtimoiy himoyaga muhtoj fuqarolarni qo‘llab-quvvatlash, huquqbuzarliklarning oldini olish va aholining turmush farovonligini oshirish borasida olib borayotgan samarali ishlaringiz alohida e’tirofga loyiq.
Aziz mahalla xodimlari!
Sizlarning zahmatli mehnatingiz, xalqparvarlik faoliyatingiz va yurt ravnaqi yo‘lidagi xizmatlaringiz yuksak qadrlanadi. Har bir xonadonga kirib borib, aholi bilan yuzma-yuz muloqotda bo‘lish, inson dardiga sherik bo‘lish — bu yuksak insoniylik va mas’uliyat namunasidir.
Fursatdan foydalanib, barchangizga mustahkam sog‘lik, oilalaringizga baxt-saodat, ish faoliyatingizda yangi yutuq va omadlar tilayman.
Tumanimiz ravnaqi, xalqimiz farovonligi yo‘lidagi sharafli va mas’uliyatli faoliyatingizda kuch-g‘ayrat tilayman!
“Mahalla tizimi xodimlari kuni” barchangizga muborak bo‘lsin!
Hurmat bilan Bahrom Norqobilov, Ohangaron tumani hokimi.