Ohangaron tumani hokimi Bahrom Norqobilovning Ramazon hayiti munosabati bilan bayram tabrigi
2026-03-20 07:00:00 / Rahbariyatning bayonotlari va nutqlari
Assalomu alaykum, qadrli tumandoshlar!
Barchangizni muborak Ramazon hayiti ayyomi bilan samimiy muborakbod etaman. Yurtimizda azaldan insonparvarlik, mehr-oqibat va bag‘rikenglik timsoli sifatida nishonlanib kelinayotgan ushbu bayram barchamiz uchun alohida ma’naviy ahamiyat kasb etadi.
Ramazon hayiti xalqimizning asrlar davomida shakllangan diniy va milliy qadriyatlari, boy an’analari va ezgu urf-odatlarini yanada mustahkamlaydigan, insonlarni mehr-shafqat, saxovat va bag‘rikenglikka chorlaydigan muborak kundir. Bu ayyomda odamlar o‘zaro ahillik va hamjihatlikni yanada mustahkamlab, bir-biriga mehr va e’tibor ko‘rsatadilar.
Ayniqsa, ushbu qutlug‘ kunlarda keksalar holidan xabar olish, ehtiyojmand oilalarni, nogironligi bo‘lgan fuqarolarni yo‘qlash, ularning holidan xabar olib, ko‘nglini ko‘tarish xalqimizga xos ezgu fazilatlardan hisoblanadi. Ramazon hayiti insonlarni yaxshilik qilishga, ehsonlar ulashishga, muhtojlarga ko‘mak berishga undaydi.
Bugungi kunda tumanimizda ham ana shunday xayrli ishlar, saxovat va muruvvat tadbirlari izchil davom etmoqda. Bu esa jamiyatimizda mehr-oqibat muhitini mustahkamlashga, aholi o‘rtasida o‘zaro hurmat va hamjihatlikni yanada kuchaytirishga xizmat qilmoqda.
Aziz tumandoshlar!
Muborak Ramazon hayiti xonadonlaringizga tinchlik-osoyishtalik, fayzu baraka, oilalaringizga sihat-salomatlik va farovonlik olib kirsin.
Barchangizni yana bir bor Ramazon hayiti bilan chin qalbimdan muborakbod etaman!
Bahrom Norqobilov, Ohangaron tumani hokimi.