Toshkent viloyati Ohangaron tumani hokimligi

Muhtaram va aziz onaxonlar, qadrli opa-singillar!

Avvalo, Siz – azizlarni bahorning ilk va eng go‘zal bayrami 8 mart – Xalqaro xotin-qizlar kuni munosabati bilan samimiy muborakbod etaman. Barchangizga sihat-salomatlik, baxt-saodat, oilaviy xotirjamlik hamda mas’uliyatli faoliyatingizda ulkan muvaffaqiyatlar tilayman.

Ma’lumki, Muhtaram Yurtboshimiz tashabbuslari bilan mamlakatimizda xotin-qizlarning jamiyatdagi o‘rni va nufuzini yuksaltirish, ularning haq-huquqlari va qonuniy manfaatlarini ta’minlash, qobiliyat va imkoniyatlarini to‘liq ro‘yobga chiqarish borasida keng ko‘lamli islohotlar amalga oshirilmoqda. Bu sa’y-harakatlar natijasida ayollarimizning jamiyat hayotidagi ishtiroki yanada mustahkamlanib, ular mamlakat taraqqiyotida faol va bunyodkor kuch sifatida namoyon bo‘lmoqda.

Ayniqsa, oila mustahkamligini ta’minlash, xotin-qizlarning baxtiyor va farovon turmush kechirishi uchun mutlaqo yangicha tizim shakllantirildi. Xotin-qizlarni har tomonlama qo‘llab-quvvatlash, ular bilan maqsadli ishlarni tashkil etish, oilalarda ma’naviy-axloqiy muhitni mustahkamlash va sog‘lomlashtirish davlat siyosatining eng ustuvor yo‘nalishlaridan biriga aylandi, desam yanglishmagan bo‘laman.

Bugungi kunda mamlakatimizda xotin-qizlarning siyosiy va huquqiy saviyasi, ijtimoiy faolligi yildan-yilga ortib borayotgani barcha sohalarda yaqqol namoyon bo‘lmoqda. Ularning sud-huquq tizimida, davlat va jamoat tashkilotlarida, iqtisodiyot, ta’lim, tibbiyot, tadbirkorlik va boshqa ko‘plab yo‘nalishlardagi samarali mehnati yurtimiz taraqqiyotiga munosib hissa qo‘shmoqda.

Bugungi kunda Ohangaron tumanida jami 48 ming 430 nafar xotin-qizlar istiqomat qiladi. Ularning 18 ming 400 nafari faol mehnat qiluvchi qatlamni tashkil etib, turli sohalarda samarali faoliyat yuritmoqda. Jumladan, 6 ming nafardan ziyod xotin-qizlar sanoat va ishlab chiqarish sohasida, 9 ming nafardan ortiq ayollar savdo, xizmat ko‘rsatish va ijtimoiy sohalarda, 1200 nafardan ortiq xotin-qizlar ta’lim tizimida, 1100 nafardan ziyod ayollar tibbiyot sohasida mehnat qilmoqda.

Shuningdek, boshqaruv tizimida 350 nafardan ziyod xotin-qizlar faoliyat olib bormoqda. Tuman Kengashi deputatlari safida esa 10 nafar ayol jamoatchilik manfaatlari yo‘lida xizmat qilib kelmoqda. Bundan tashqari, bugungi kunda tumanda 160 nafar tadbirkor ayol, 4138 nafar oila bekalari, 7 nafar otinoyi, 21 nafar xotin-qizlar faollari, 6 nafar ichki ishlar organlari xodimlari, 1646 nafar oliy ta’limda tahsil olayotgan qizlar hamda 7500 nafardan ortiq pensiya yoshidagi onaxonlar borligi ham jamiyatimizda ayollar faolligi tobora ortib borayotganining yorqin dalilidir.

Aziz va mo‘tabar onaxonlar, muhtaram opa-singillar!

Sizlar – oila fayzi, xonadonlarimiz chirog‘i, farzandlarimiz tarbiyachisi, jamiyatimiz ma’naviy tayanchisiz. Sizlarning mehr-oqibatingiz, sabr-bardoshingiz va fidokorona mehnatingiz yurtimiz taraqqiyoti va kelajagi uchun mustahkam poydevor bo‘lib xizmat qilmoqda.

Fursatdan foydalanib, barchangizni ushbu ayyom bilan yana bir bor chin qalbimdan tabriklayman. Sizlarga mustahkam sog‘lik, uzoq umr, oilaviy baxt-saodat tilayman.

Bayramingiz muborak bo‘lsin, aziz va muhtaram ayollar!

Bahrom NORQOBILOV, Ohangaron tumani hokimi.