Toshkent viloyati Ohangaron tumani hokimligi

Dastlab, qishloq xo‘jaligi sohasini rivojlantirish masalalari muhokama qilinib, mavjud kamchiliklar keskin tanqid ostiga olindi. Xususan, fermer xo‘jaliklarida yashirin iqtisodiyotga barham berish, yangi ish o‘rinlarini yaratish, soliqdan qochish holatlarini bartaraf etish, moliyaviy hisobotlarda daromadlarni real ko‘rsatish masalalariga alohida e’tibor qaratildi. Bu borada mutasaddilarga aniq vazifalar yuklatildi.

Shuningdek, tumanda chorvachilik sohasini yanada rivojlantirish masalasi ham atroflicha muhokama etildi. Chorvachilikka ixtisoslashgan fermer va tadbirkorlarning tijorat banklari bilan hamkorligini kengaytirish, sohaga ilg‘or xorijiy tajribalarni joriy etish orqali ishlab chiqarish hajmini oshirish zarurligi ta’kidlandi.

Yig‘ilishda aholi va qishloq xo‘jaligini ro‘yxatga olish bo‘yicha dastlabki bosqich — onlayn ro‘yxatdan o‘tish jarayonlari yakunlari tahlil qilindi. Ushbu jarayonda jonbozlik ko‘rsatgan mas’ullar rag‘batlantirilishi qayd etilgan bo‘lsa, sustkashlikka yo‘l qo‘ygan xodimlar ogohlantirildi va kamchiliklarni zudlik bilan bartaraf etish vazifasi qo‘yildi.

Tumanda statistika sohasida mavjud kamchiliklar ham yig‘ilish davomida tanqidiy muhokama qilindi. Ushbu yo‘nalishga malakali mutaxassislarni jalb etish, mavjud ko‘rsatkichlarni real baholash hamda shu asosda tumanning kelgusidagi rivojlanish strategiyasini belgilash muhim ekani alohida ta’kidlandi.

Shu bilan birga, tumanning investitsion va eksport salohiyatini oshirishga qaratilgan chora-tadbirlarni izchil amalga oshirish, mavjud imkoniyatlardan samarali foydalanish vazifalari belgilab berildi.

Yig‘ilishda tuman hokimligi tomonidan tayyorlanayotgan hujjatlarga huquqiy xulosa berish ishlarining sifati, shuningdek, budjet mablag‘larining maqsadli va oqilona sarflanishi masalalari ham muhokama qilinib, ushbu yo‘nalishlarda nazoratni kuchaytirish lozimligi qayd etildi.

Bundan tashqari, “Toza hudud” korxonasi faoliyati "qoniqarsiz" deb baholanib, joylarda maishiy chiqindilarning o‘z vaqtida olib ketilmayotgani yuzasidan fuqarolar tomonidan ko‘plab shikoyatlar kelib tushayotgani ta’kidlandi. Mas’ullarga ushbu muammoni bartaraf etish bo‘yicha aniq choralar ko‘rish topshirildi.

Yig‘ilish davomida O‘zbekiston Respublikasi Prezidentining Oliy Majlisga va O‘zbekiston xalqiga Murojaatnomasida, shuningdek, barcha sohalarga bag‘ishlangan videoselektor yig‘ilishlarida belgilangan vazifalarning tumandagi ijrosini ta’minlashga qaratilgan qarorlar qabul qilish zarurligi alohida qayd etildi.

Shuningdek, joylarda kutubxonalar tashkil etish, ma’naviy-ma’rifiy tadbirlarni kuchaytirish, sport musobaqalarini muntazam o‘tkazish, aholi uchun chuqurlashtirilgan tibbiy ko‘riklar tashkil etish, ijtimoiy himoyaga muhtoj oilalar bilan manzilli ishlash, ijro intizomini mustahkamlash, mehnat jamoalarida korrupsiya holatlarining oldini olish hamda “og‘ir” toifali mahallalar bo‘yicha belgilangan chora-tadbirlarni o‘z vaqtida bajarish masalalari yuzasidan atroflicha fikr almashildi.

Yig‘ilish yakunida tanqidiy-tahliliy ko‘rib chiqilgan har bir masala yuzasidan tegishli mas’ullarga aniq vazifalar belgilab berildi. Shuningdek, vazifalar ijrosida har bir rahbarning shaxsiy mas’uliyati va namuna ko‘rsatishi eng muhim mezon ekani alohida ta’kidlandi.