Toshkent viloyati Ohangaron tumani hokimligi

Tadbir davomida onalar va bolalar salomatligini muhofaza qilish, erta tashxis qo‘yish, profilaktika ishlarini kuchaytirish hamda oilalarda sog‘lom turmush tarzini qaror toptirishda patronaj doyalarning o‘rni beqiyos ekani alohida ta’kidlandi. Patronaj xizmati orqali homilador ayollar, yangi tug‘ilgan chaqaloqlar va yosh bolalarning salomatligini muntazam nazorat qilish, xavfli holatlarni barvaqt aniqlash va o‘z vaqtida tibbiy yordam ko‘rsatish bo‘yicha amalga oshirilgan ishlar tahlil etildi.

Tadbir doirasida “Patronaj doya — ayol salomatligi” ko‘rik-tanlovi ishtirokchilarini taqdirlash marosimi ham tashkil etildi. Unda patronaj xizmatining turli yo‘nalishlarida faollik ko‘rsatgan doyalar 10 dan ortiq nominatsiyalar bo‘yicha munosib taqdirlandi. Jumladan, “Eng yaxshi patronaj doya”, “Eng namunali sog‘lom oila xonasi patronaj doyasi”, “Eng faol sog‘lom turmush tarzi targ‘ibotchisi”, “Ona sutining eng faol targ‘ibotchisi”, “Og‘ir holatda zudlik bilan to‘g‘ri qaror qabul qilgan patronaj doya” kabi nominatsiyalar g‘oliblari e’lon qilindi.

Quvonarlisi, taqdirlanganlar orasida Ohangaron tumani Tibbiyot birlashmasiga qarashli 37-sonli oilaviy poliklinikada faoliyat yuritayotgan patronaj doya Nodira Ahmedova ham bor. U o‘zining mas’uliyatli mehnati, aholi bilan samarali muloqoti va kasbiga sadoqati bilan ajralib, “Eng yaxshi patronaj doya” nominatsiyasi bo‘yicha g‘olib deb topildi.

Mazkur yutuq munosabati bilan Ohangaron tumani Tibbiyot birlashmasi jamoasida tantanali tadbir tashkil etildi. Unda birlashma boshlig‘i Javlon Kadirov tomonidan Nodira Ahmedovaga tashakkurnoma va qimmatbaho sovg‘a topshirilib, uning onalik va bolalikni muhofaza qilish yo‘lidagi fidokorona mehnati yuksak e’tirof etildi.

Tadbirda so‘zga chiqqanlar bunday e’tiroflar patronaj doyalarning mehnatini rag‘batlantirish, ularning mas’uliyatini yanada oshirish hamda sohada sog‘lom raqobat muhitini yaratishga xizmat qilishini ta’kidladi.