Uchrashuv davomida mahallada joriy yilda amalga oshirilgan ishlar, ijtimoiy-iqtisodiy sohada erishilgan natijalar, shuningdek, aholining turmush darajasini yaxshilashga qaratilgan tashabbuslar yuzasidan batafsil taqdimot namoyish etildi. Taqdimotda mahalla hududida obodonlashtirish va ko‘kalamzorlashtirish ishlari, ichki yo‘llar ta’miri, ijtimoiy infratuzilmani rivojlantirish, aholini bandlikka jalb etish va kam ta’minlangan oilalarni qo‘llab-quvvatlash bo‘yicha amalga oshirilgan chora-tadbirlar alohida qayd etildi.

Tuman hokimi Bahrom Norqobilov taqdimot bilan tanishar ekan, mahallaning kelgusidagi rivojlanish rejalariga ham alohida e’tibor qaratdi. Jumladan, yangi ish o‘rinlari yaratish, yoshlar va xotin-qizlar bandligini ta’minlash, mahallada ijtimoiy xizmatlar sifatini oshirish, shuningdek, aholini qiynayotgan muammolarni o‘z vaqtida hal etish masalalari muhokama qilindi.

Uchrashuv davomida mahalla “yettiligi” a’zolari tomonidan joylarda uchrayotgan ayrim muammolar, ularni bartaraf etish bo‘yicha taklif va tashabbuslar ham ilgari surildi. Tuman rahbari bildirilgan har bir masala bo‘yicha mas’ullarga tegishli ko‘rsatmalar berib, mahallada “inson manfaati — eng ustuvor” tamoyili asosida ish olib borish zarurligini ta’kidladi.

Mazkur uchrashuv mahallalarda davlatimiz rahbarining “mahalla — jamiyatning tayanchi” degan g‘oyasini amalda ta’minlash, joylardagi islohotlar samaradorligini oshirish va aholi bilan ochiq muloqotni yanada mustahkamlash borasida muhim ahamiyat kasb etdi.