Bahrom Norqobilov xitoylik hamkorlar bilan uchrashdi
2025-12-23 16:15:00 / Yangiliklar
Jumladan, Ohangaron tumani hokimi Bahrom Norqobilov “Toshkent Conch Cement” MCHJ xorijiy korxonasining mahsulot realizatsiyasi bo‘yicha Bosh direktori Li Syan bilan uchrashuv o‘tkazdi. Uchrashuv davomida korxonaning joriy faoliyati, ishlab chiqarish jarayonlari, mahsulot realizatsiyasi va eksport hajmlari, shuningdek, tuman hokimligi bilan o‘zaro hamkorlikni yanada rivojlantirish masalalari atroflicha muhokama qilindi.
O‘zaro muloqot chog‘ida xitoylik hamkorlar O‘zbekistonda, xususan, Ohangaron tumanida xorijiy investorlar uchun yaratilayotgan qulay investitsiya muhiti, qonunchilikdagi imtiyozlar va amaliy qo‘llab-quvvatlash mexanizmlarini yuqori baholadi. Shuningdek, tuman hokimligi bilan hamkorlik aloqalarini kelgusida yanada kengaytirishdan manfaatdor ekanliklarini bildirdi.
O‘z navbatida, tuman hokimi Bahrom Norqobilov Ohangaron tumanining investitsion jozibadorligi yildan-yilga ortib borayotganini, bu borada mahalliy va xorijiy tadbirkorlar bilan o‘zaro ishonchli hamkorlik aloqalari tobora mustahkamlanayotganini ta’kidladi. Shuningdek, tuman hokimligi ikki tomonlama hamkorlikdan mamnun ekanligini bildirib, investorlar faoliyatini qo‘llab-quvvatlash kelgusida ham ustuvor vazifa bo‘lib qolishini qayd etdi.
Ma’lumot o‘rnida aytish joizki, “Toshkent Conch Cement” MCHJ xorijiy korxonasi Ohangaron tumanining “Qiziloy” mahallasi hududida joylashgan bo‘lib, loyiha qiymati 200 million AQSH dollarini tashkil etadi. Yiliga 2 million tonna sement mahsulotlari ishlab chiqarish quvvatiga ega bo‘lgan mazkur korxona faoliyati natijasida 300 ta yangi ish o‘rni yaratilgan. Ushbu loyiha tuman sanoat salohiyatini oshirish, eksport imkoniyatlarini kengaytirish hamda aholi bandligini ta’minlashda muhim ahamiyat kasb etmoqda.