Bosh vazir o‘rinbosari yirik investitsion loyiha bilan tanishdi
2025-12-22 08:55:00 / Yangiliklar
O‘rganish davomida ushbu loyihaning ahamiyati, bugungi kundagi qurilish ishlarining borishi xorijlik hamkorlar bilan birgalikda muhokama qilindi.
Ma’lumot o‘rnida:
O‘zbekiston Respublikasi Prezidentining 2025-yil 24-martdagi “Toshkent shahri, Toshkent va Andijon viloyatlarida qattiq maishiy chiqindilarni yoqish orqali elektr energiyasi ishlab chiqarish” investitsiya loyihasini amalga oshirish chora-tadbirlari to‘g‘risida”gi PQ–116-sonli qaroriga muvofiq, Xitoy Xalq Respublikasining “China CAMC Engineering” kompaniyasi tomonidan Ohangaron tumani “Yangi hayot” mahallasi hududida 240 million AQSH dollari miqdorida to‘g‘ridan to‘g‘ri investitsiyalar jalb etgan holda yiliga 912 ming tonna(kuniga 2.5 ming tonna) chiqindilarni termik usulda qayta ishlash orqali 390 million kVt elektr energiyasi ishlab chiqarishga qaratilgan investitsiya loyihasi amalga oshirilmoqda.
Davlatimiz rahbarining 2025-yil 24-martdagi PF–56-son Farmoniga asosan Ohangaron tumani “Yangi hayot” mahallasi hududida ekosanoat zonasini tashkil etish uchun tanlab olingan 14,7 gektar yer maydonining 12 gektarida zavod qurilish ishlari davom etmoqda.
Hozirgi vaqtda qurilish ishlariga 30 dan ortik maxsus texnika va 200 nafarga yaqin ishchi jalb qilinib, kompaniya tomonidan topografik-geodezik tadqiqot va izlanish ishlari hamda yer maydonlarini teksilash ishlari yakunlangan.
Bugunga qadar zavodning asosiy binosi qurilishi rejalashtirilgan hududda jami 26 ta ustun (svaya)lar qoqilib, dekabr oyi yakuniga qadar ustun qoqish ishlari to‘liq yakunlanadi.
Zavodning bosh rejasi, joylashuv sxemasi va dizayn-loyihasi ishlab chiqilib, maxsus asbob-uskunalar va qurilish materiallarining smeta hujjatlari shakllantirilib, asosiy texnologik uskunalar uchun 50 % uchun kompaniya tomonidan buyurtmalar berilgan.
Hozirda tanlab olingan yer maydonida qurilish-montaj ishlari rejaga muvofiq amalga oshirilmoqda. Mazkur loyihani jadallashtirish bo‘yicha xorijiy investor hamda tegishli vazirlik va idoralar bilan hamkorlikda ishlar tashkil etilmoqda.